Shillong, Nailur 26 :Ka Federation of Khasi Jaintia and Garo People (FKJGP) hynne ka sngi nyngkong, kala pynbna ba kan pynlong da ka Rally paidbah ha ka 21 tarik Risaw namar ka jingsngewkhia halor ka jingnang kiew ha ka jingbym iohkam iohjam jong ki samla ka jylla Meghalaya.
U President ka FKJGP Bah Dundee C Khongsit ula pyntip sha ki nongthoh khubor ba kane ka rally kan sdang na Motphran bad kan kut ha madan Malki.
Une u Nongialam ka FKJGP ula ong ba ka seng, ha ka jingwad bniah kala lap ba ki don kumba 1,60,000 ngut ki samla kiba khlem kam khlem jam hapoh ka Jylla baroh kawei.
“Ka Seng ka sngewkhia, ha baroh kine ki snem ki ba la dep, ki samla kila wan iakynduh ia ngi bad iathuh ia ki jingeh ba ki iakynduh bad kane baroh hi ka daw na ka jingkhein sting jong ka Sorkar Jylla ban pyndap ne thung briew ha ki kam kiba lait hapoh ki Tnad bapher bapher” ong u Bah Dundee.
Ka FKJGP kala bynrap ruh ba kala shim ia kane ka sienjam ban ai ka rynsan ia ki samla ba kin pynsngew iala ka jong ka sur.
Ha kajuh ka por, ka FKJGP kala pynpaw ruh ia ka jingpyrshah halor ka jingthungkam contract. “Ngi kwah ban phah ia ka khubor kaba shai sha ka Sorkar Jylla ba ngi dei ban pynkut noh ia ka jingthungkam contract namar ka pynduhnong ia ki nongiohkam khamram ba kam don satia ka jingshngain ia ki” ula ong.
Ka FKJGP kala ai jingmut ruh iaka Sorkar bah aba pynlong ia kano kano ka eksam thungkam, ka dei ban long kaba khuid bad ba shai.
“Ngi kwah ai jingmut ba haba pynlong ia ki Personal Interview, dei ban record hapoh ki camera” ong u Bah Dundee.
