Shillong, Rymphang 26: Ka tnat Election Commission of India (ECI) hynne ka sngi U Blei, kala rai ban iarap pisa T. 15 lak sha ka longing jong u Chesan Ch Marak uba la khlad noh namar ka jingjia aksiden kaba la jia hapoh ka shnong Potamati West Garo Hills.
Lah ban kdew ba u Chesan Ch Marak (30 snem ka rta) udei u Technical Assistant jong ka skhim MGNREGA ha Gambegre Block bad ula shah thung kum u Second Polling Officer hapoh ka Jangrapara Polling Station kaba hap hapoh ka Tikrikilla constituency.
U Chesan Ch Marak (Bam kwai dwar u Blei) ula don lang bad 7 ngut ki ba khmih iaka jingthep Vote bad ka kali Mahindra Pickup kala ngat haka jingjia aksident hapoh ka shnong Potamati West Garo Hills hadien ba u Dribar jong kane ka kali um lah shuh ban tehlakam iaka kali.
Hadien kane ka jingjia la pynkit ia u Chesan sha ka jaka sumar ba jan bad namar ba ula mynsaw jur la pynkit noh sha Guwahati hynrei ula khlad noh na kane ka pyrthei.
Haba phah khubor sngewlem shaka ing ka sem u Chesan Marak, naka liang u Chief Electoral Officer (CEO) ka jylla u bah F.R Kharkongor ula ong ba ka tnat pyniaid iaka ilekshon khamtam kaba peit iaka West Garo Hills, ka phah khubor sngewlem sha ka ing ka sem kum ha kane ka sngi ba dum bad ka buh haka jingduwai.
U bah Kharkongor ula ong ba u Chesan Marak (Bam kwai dwar u Blei) udei u briew u ba trei shitom bad naka liang ka tnat ka phah khubor sngewlem sha ka ing jong u.
Ula ong ba tnat Election kan ai ka jingiarap pisa T. 15 lak kum ka dak ban pynpaw iaka jingtrei shitom jong u.
