Shillong, Nailur 17: Ka scheme ba thymmai na ka bynta ki nongshna jingshna da ki kti bad ki nongthain jingthaiñ ka PM Vishwakarma, la pyllait paidbah hynne ka sngi u Blei da u Myntri Rangbah duh ka ri u Narendra Modi haka jingrakhe iaka Vishwakarma Jayanti ne ka Vishwakarma puja.
Ha shwa ban pyllait paidbah iaka jingtreikam kane ka scheme u Myntrii Rangbah duh ka ri ula leh burom da kaba leit buh syntiew ia u Blei Vishwakarma haka India International Convention and Expo Centre ha Dwarka.
Ka Cabinet Committee on Economic Affairs dang shen kala bhah T. 13,000 Klur
Ia katei ka scheme yn ioh da ki nongshna jingshna da ki kti bad ki nongthain jingthaiñ tynrai naduh ka mang tyngka jong u snem 2023–24 haduh ka 2027–28.
Hapoh kane ka scheme, ki Vishwakarma yn rejistar ei lyngba ka Common Services Centres (CSC) da kaba pyndonkam iaka PM Vishwakarma Portal, ha kaba yn ai jingithuh ia ki da kaba ai iaka PM Vishwakarma certificate bad Identity card, ka jingai jinghikai ban pyntbit shuh shuh iaka sap ka phong, ka jingai jingiarap ban thied ia ki tiar ki tar kaba kot T.15,000, ka jingai jingkyrshan da ka pisa T.1 lak ha ka wat kaba nyngkong bad ka T.2 lak ha ka wat ka baar ha kaba kan don ruh ka jingpynduna iaka ram da 55% bad kumta ter ter.
Kane ka scheme kan ai jingkyrshan ia ki nongshna jingshna da ki kti bad ki nongthain jingthaiñ tynrai kiba don ha sor bad ha nongkyndong.
Ki don 18 tylli ki jait jingtrei kiba la ithuh lyngba katei ka scheme kaba kynthup ia ka kam misteri, nongshna lieng, nongshna ia ki jingdeng iada, nongsain nar, nongshna ksiar, nongshna taka shabi, nongshna ia u tyrnem bad kiwei kiwei, nongshan khiew dewbyrta, nongoh shrong dur, nongsain maw, nongsuh juti, nongthain synsar, shang, nongshna khunbynriew bad ki jingialehkai, nongkhap shniuh, nongsaitjain bad nongshna jar tong dohkha.
U Myntri khynnah ka sorkar pdeng uba khmih iaka Jal Shakti, Food Processing & Industries u Prahlad Singh Patel ula plie pyrda iaka ‘PM Vishwakarma’ scheme ha nongbah Shillong.
U Prahlad Singh Patel ula leit ruh ban iakynduh ia u Myntri Rnagbah ka jylla u Conrad Sangma ha ka iingsah ka jongu ha Shillong.
