Shillong Naiwieng 22: U Myntri khynnah ka tnad jngohkai jong ka sorkar pdeng Shripad Yesso Naik ha ka 21 tarik mynta u bnai, ula pyllait paidbah ia ki Saw tylli ki projek hapoh jong ka PRASAD – Pilgrimage Rejuvenation And Spiritual Augmentation Drive Scheme na ka bynta ka jylla Meghalaya.
Kine ki project ki kynthup ia ka jingtei pynitynnad ia ka Nongsawlia Presbyterian Church, Nartiang Shakti Peeth, Aitnar Pool and Charantala Kali Temple.
Ia katei la pyllait paidbah ha ka International Tourism Mart kaba 11, ha kaba la iadonlang u Myntri Rangbah ka jylla u Conrad K Sangma bad kiwei kiwei.
Hapoh jong ka PRASHAD scheme, ka Ministry of Tourism kala bhah tyngka na ka bynta 8 tylli ki project kaba kot T. 256.45 Klur ban shna pynbha ia ki jaka leit Pilgrim kiba don ha ka thain shatei lam mihngi.
Ka Nartiang’s Durga Temple kadei ka jaka kaba don ha rilum Jaintia kaba don marjan bad ka jaka kaba don ki Mawbynna bad katei ka Temple kadei kaba la don 500 snem ia kaba la ngeit ba kadei ka ‘Shakti Peeth’ bad kadei kawei na ki jaka mane kaba paw hapoh ka ri.
Ka Nongsawlia Presbyterian Church, kadei kaba la tei ha u snem 1846 da u Thomas Jones bad kadei ka iingmane kaba la rim tam hapoh ka thain shatei lam mihngi.
Ka Aitnar kadei ka jaka kaba kongsan haka jingleh ia ka niam Behdienkhlam kaba dei ka jingleh niam tynria jong ki Pnar.
Ka Charantala Temple ha West Garo Hills kadei ka jaka mane Blei jong ki Hajong bad Koch bad kadei ka jaka kaba khring bha ia ki paidbah na kylleng ki jylla.
Ka Sorkar India kala sdang iaka PRASAD scheme ha u 2014-2015 lyngba ka Ministry of Tourism bad kane ka skhim ka phaikhmat ha kaban kyntiew ia ki jaka mane Blei kiba don ha kylleng jong ka ri India ba kin long ruh kum ki jaka kiba khring ia ki nongjngohkai.
Haba kren ha ka jingialang u Myntri Rangbah ka Meghalaya ula pynpaw iaka jingkmen ba ka nongbah Shillong kala pynlong ia ka International Tourism Mart ha ka sien ka baar bad ula ong ba ka sorkar pdeng hapoh ka jingialam u Myntri Rangbahduh ka ri ula bteng ban pynthikna ba ka thaiñ shatei lam mihngi kan kiew shaphrnag ryngkat lang bad kiwei pat ki jylla hapoh jong ka ri ryngkat bad ka kular ban ai iaka lawei kaba bha ha kaban kyntiew ia ka ioh ka kot ha ka thaiñ.
Ula pynpaw ruh ba ka International Tourism Mart kadei ka kabu ha kaban kyntiew ia ka kam jngohkai ka thaiñ shatei lam mihngi, ka kolshor kaba kyrpang, ki jaka donnam ki barim bajah,ka riti ka dustur bad ki mar bad kadei ka shlem ha kaba kiba don bynta haka kam ki pyniadei bad ki nongthied kiba napoh ka ri bad nabar ri.
