Pyllait u Lat ia ka kali IEC ban iaid pynshai paidbah ia ki skhim sorkar ha jaka sor

Shillong Nohprah 01: U Lat ka jylla Meghalaya, u Phagu Chauhan hynne ka sngi Thohdieng ula plie paidbah ia ka kali IEC (Information, Education and Communication) Van na ka bynta ki jaka sor hapoh ka Viksit Bharat Sankalp Yatrana ha ka jingialang kaba la long ha Raj Bhavan Shillong.

Ha kane ka prokram la wan iashim bynta lang da ki ophisar ka Sorkar Jylla na ka Tnat ka Koit ka Khiah, Civil Supplies, MUDA, District Lead Bank Manager, Shillong Municipal Board bad Social Welfare.

Kane ka sienjam, kaba la sdang na Khunti, Jharkhand, ha ka 15 tarik u Naiwieng, 2023, kadei kaba kyrpang na ka bynta ki jaka rilum bad kaba la pyniar mynta ban peit lang ia ki jaka nongkyndong bad ki jaka sor.

Ha Meghalaya, kane ka kali kan poi sha ki dong ha kylleng ka jylla bad kane ka Yatra ka dei ka dak jong ka kam ai jingtip kaba heh tam jong ka Sorkar India kaba don iaka nongrim ha ka roi ka par kaba pdiang lang ia baroh bad ka thmu ban pynthikna ba ki jingmyntoi na ki skhim sorkar kin poi sha baroh ki bynta jong ka ri.

Man ka sngi, kine ki kali kin sangeh ha ar tylli ki jaka bad kin plie lad ia ki Health Camp, ka jingkyntiew kyrteng Aadhar bad kiwei kiwei ki jingai jingshakri.

Ki jingioh jingtip mardor ba la plie lad da ki kali Information, Education, and Communication (IEC) van, ka dei kaba poi ha ka rynsan ba la sdang da ka Digital India Corporation hapoh ka tnat Electronics bad Information Technology.

Ka thong jong ka Viksit Bharat Sankalp Yatra kadei ban ai jingtip bad pynpoi ia ki jingmyntoi jong ki skhim kiba iadei bad ka jingkhuid, ki kam pisa, ka bording, ki iing sah briew bad kiwei kiwei. Ki skhim ba kham kyrpang ki long ka Ayushman Bharat, PM Garib Kalyan Anna Yojana, PM Svanidhi bad PM Awas Yojana bad kiwei kiwei.

Ha kane kajuh ka sngi, kala don ka prokram ai jingtip hajan Polo ha Shillong ha kaba ki tnad bapher bapher kila iashimbynta bad la sam ruh ia ki certificate ha kane ka jaka ia ki nongioh jingmyntoi na ka PM Svanidhi.