Shillong, Jymmang 21: U Bah Process T Sawkmie, MLA barim bad kum u Co Chairman ka Meghalaya State Development Reform Commission (SDRC) badang shah thung shen ha ka sorkar, ha ka sngi Saitjain ka 20 tarik u Jymmang, 2023 u la pyllait ia ka jingrwai Gospel ba la ai kyrteng, “Ngin ieng da bor U Blei” ba la thaw bad rwai da ka kynhun Ketsa ba la pyllait ha phyllaw iing jong bah PT Sawkmie, ha Mawlai Nongpdeng.
Ha kane ka kynhun Ketsa ki don sawngut ki nongrwai ba kynthup ia u samla Khraw Burom Umdor, Darisuklang Rani, Eddingson Marwein bad Chalcedony B Lynser.
Haba ai jingkren kum u kongsan bah PT Sawkmie, u la pynpaw ia ka jingkmen ban ioh pyllait ia ka jingrwai ba la thaw da u samla Khraw Burom Umdor bad ka kynhun.
U la kitbok ba kin nangkiew na kawei sha kawei ka por, haba ia dei bad ka kam shakri ia U Blei lyngba ki jingrwai.
“Sngewsarong ban iohi ia ka sap ka phong ba ki khun samla ki don bad kitbok ia ki ba kin iaid shakhmat ban trei shitom ban pynurlong ia ki sap ki phong ba ki don,” ong u Co Chairman ka SDRC.
Ha kane ka sngi la ioh ruh ia ka jingkren na bah Wanseng Jyrwa, working president ka UDP Mawlai, u la pyrto ia kine ki khun samla kiba la pynmih ia kane ka jingrwai bad u la kyntu ia kiwei ki khun samla kin bud ia ka nuksa jong ki ban lait na kiwei ki jingsniew.
La ioh ia ka jingkren khublei pynwai na u bah Homer Kharkongor, president ka UDP Mawlai Circle ha ka jingdon ryngkat ki nongkitkam ka UDP Mawlai.
