Shillong, Jymmang 21: Ka skulbah NEHU Shillong bad ka Gujarat University hynne ka sngi kila iateh lok ban treilang lyngba ka ‘e-Launching’ ha kaban pyntbit haka “Natural Farming, Agripreneurship and Cooperatives”.
Ia kane ka jinghikai pyntbit la sdang naduh 8 tarik Naiwieng 2022 haka ba ka NEHU kala soi daka MoU bad ka Indian Institute of Sustainability ka skulbah Gujarat University haka jingdon lang u Lat ka jylla Gujarat u Acharya Devvrat.
Ha kane ka sngi la pynlong ruh daka National Seminar bad ka phangpdeng ka long “Organic farming in North-East India: A vision toward Sustainable Agriculture, Livelihood and Nutritional Security” daka BIRAC’s BioNEST Bio-Incubator Facility, Tura Campus haka jingitreilang bad ka ICAR RC NEH Region Umiam, IPR Cell, NEHU bad ka Indian Institute of Sustainability, Gujarat University.
Ha kane ka National Seminar, la wan shim bynta lang da u Lat ka jylla Gujarat u Acharya Devvrat, ka First Lady of Gujarat ka Darshana Devi, u VC ka NEHU u Prof. Prabha Shankar Shukla.
Lyngba kane ka MoU, la kdew ba kan don ka jingia kylliang nonghikai bad samla pule hapdeng kine 2 tylli ki skulbah kata ka NEHU bad ka Gujarat University.
Haba kren ha kane ka sngi, u VC ka NEHU u Prof. Prabha Shankar ula ong ba katkum ka Vedas, Puranas and Ramcharitas ki don 5 tylli ki bynta ban iaid haka jingim bad napdeng kine kawei kadei ka mei mariang.
U Prof. Shankar ula ong ba ka mei mariang ka lah ban pyndap iaki jingdonkam namar ka pynmih iaki dieng ki soh kiba tei met naka bynta baroh ki jingim bad iaki briew baroh.
Ula ong ba ka jingkyntiew haka rep ka riang kan wanrah iaka jingbha bad kan kyntiew ruh iaka rukom pynneh pynsah iaka pyrthei bad haka juh ka por ula ai khublei ia u Lat ka jylla Gujarat uba la wan shim bynta ha kane ka National Seminar.
Naka liang u Lat ka jylla u Acharya Devvrat ula ai ka jingiaroh ia ka NEHU bad ka IIS jong ka skulbah Gujarat University haka jingitreilang ban kyntiew iaka Pule Puthi hapoh ka jylla bad ka ri baroh kawei.
U Acharya Devvrat ula ong donkam ban pyniatylli iaka ri India daka pule puthi.
Haba pynkynmaw ba ialade ruh udei u nongrep, u Acharya Devvrat ula ong ba ka donkam bha ban pyntreikam iaka rukom rep ka juk stad mynta hynrei ym dei pat ban pyndonkam iaki dawai Chemical namar kan ktah iaka mei mariang khamtam iaka khyndew bad ka um hadien ha bud.
