Shillong, Lber 12: U Myntri Rangbah ka jylla u Conrad K Sangma hynne ka sngi Baar ula buh mawnongrim ban pyntreikam ia ki 4 tylli ki projek ha nongbah Shillong bad kine ki kynthup ban pynitynnad ia ka Iewduh, Ward’s Lake bad ia ki Mechanised Multi Level Car Parking kiban pyndonkam da ki kor teknoloji ban pynduna iaka jingkhngiah ha ki surok jong ka nongbah.
U Myntri Rangbah ula buh ia u mawnongrim ha ka jingialang kaba la long ha Ward’s Lake ne Nan Palok.
Kitei ki 4 tylli ki projek ki kynthup ia ka jingtei ia ka Commercial Building ha Polo, Mechanised Multi-Level Car Parking ha Vivekananda Road hajan ka Additional Secretariat bad ka Polo Commercial Complex, ka jingpynitynnad ia ka Iewduh bad ka jingpynbhabriew ia ki 5 tylli ki pung ha ka jylla bad ia ka Ward’s Lake Promenade.
Laid foundation for three major projects this afternoon that will ensure beautification and decongestion of Shillong city.
The projects are :
1. Development of Parking Infrastructure under Shillong Smart City Pvt Ltd. The Government is developing over 1200 + parking space in… pic.twitter.com/tmFtmqFdDR— Conrad K Sangma (@SangmaConrad) March 12, 2024
U Myntri Rangbah ula ong baka sorkar kaladon iaka jingangnud kaba khraw ban pynkylla ia ka nongbah Shillong sha ka nongbah kaba katkum kane ka juk kaba mynta bad ban ai ia ka donkam kaba kadei ban ioh ha ryngkat bad ka iaid ban ialeh ban pynkylluid ia ka nongbah.
Ha kaba iadei bad ka jingpynitynnad ia ka Iewduh, u Myntri Rangbah ula ong, “Kane kadei kaei kaei kaba kila ia pyrkhat bha bad kila trei khnang ba ka Iew kan itynnad bad ban pynbha ia ki jingdonkam khnang ba kan plie lad ban khring ia ki nongjngohkai bad iaki nongshong shnong ki jong ngi kiba leit ha katei ka Iew”.
Ha ka jinglut kaba kot T.15 Klur, katei kaprojek ka thmu ban pynbha bad pynkylla dur ia katei ka iew tynrai kaba la rim bha. Kane ka projek ka kynthup ia ka jingpyniaid ryntih ia ki pipe um, ban tei ia ki nala, ban tei ia ki paiñkhana, ki kali lum niut bad ki tin bret niut, ka jingbuh ia ki bording bad bna pynitynnad ia ki building khnang ba kan ai jingmyntoi ia ki nongdie, nongthied bad ki nongjngohkai.
Ha kaba iadei bad ka jingpynbhabriew ia ka Ward’s Lake bad ia ka Ward’s Lake Promenade, u Conrad ula ong, kum shi bynta jong ka projek, ba ka bynta kaba don 1.5-2 Km mar pyrshah ia ka Ward’s Lake yn pynbha ia ki dukan, ka jaka die madan, jaka ieng kali bad ki Restaurant ban kyntiew ia ka jingdie ki trai jylla bad ban long kum ka jaka kaba ki paidbah kin ioh ban iakynduh bad ban iakren iakhana.
Ula iathuh ruh ba kiwei pat ki sienjam kiba thmu ban leh ban pynitynnad ia ka Ward’s Lake ki kynthup ban pynkhuid ia katei ka pung, Laser Show, Amphitheatre, Water Fountain bad kiwei kiwei.
“Ka Ward’s Lake ka don ia ka kabu kaba paka bha ym tang na ka bynta ki nongjngohkai hynrei wat ia ki nongshong shnong hapoh ka jylla hynrei ngim shym la khmih bniah bha ia kitei kiei kiei kiba ngi lah ban leh” ula ong.
U Myntri Rangbah ula ong ba ka sorkar ka phaikhmat bha iaka mat jong ka jingkhapngiah bad kajingdheng kali ha ka nongbah Shillong.
“Watla ngi la don ia ka master plan ban pynkylluid iaka nongbah Shillong da kaba pynkynriah ia ki ophis treikan sha ka New Administrative City bad Knowledge City, ngi dang trei man la ka sngi ha ki kam ki barit kiban wanrah ia ka jingkylla bad ia u mawnongrim uba ngi la buh mynta na ka bynta ka Mechanised Multi-Level Car Parking kadei ka sienjam kaban poi sha katei” ula ong.
Ula pyntip ruh ka jinglut jingsep jong katei ka projek kan long kumba T.90 Klur kaban don 465 tylli ki jaka ieng kali.
Nalor kane ki 5 tylli ki pung ha ka jylla kiba kynthup ia ka Ward’s Lake, Malse Lake, Nirman Jheel, Memo Lake ha Williamnagar bad ka Rangjokram Lake ha Resubelpara kin sa shah pynitynnad noh bad shah pynkhuid, la pynbna u Myntri Rangbah.
Kane ka projek kan kynthup ia ka jingpynkhuid, ka jingshna ia ki katto katne ki jingdonkam bad ban ker ia kitei ki pung.
U Myntri Rangbah ula pynbna ruh ia ki projek kiba ka sorkar kala pyniaid shakhmat bad ia ki projek kiba ka don jingthmu ban pyntreikam ban weng ia ka jingkhapngiah, ban kyntiew bad pynkylluid bad pynbhabriew ia ka nongbah Shillong.
