Shillong, Naitung 23: U Myntri Rangbah ka jylla u Conrad K Sangma ula pyllait paidbah ia ar tylli ki kot “His Story: Trailblazing Men of Meghalaya bad His Footprints in Time: Meghalaya’s Trailblazers and The Making of Modern India ha ka jingïalang kaba kyrpang kaba la long ha ophis treikam ka jongu ha Secretariat.
Ha ka jingpyllait ia kitei ki kot, la wan ban iadonlang u Rev. E.R. Kharkrang, President jong ka Governing Body, ka Principal jong ka Synod College ka Dr. G. Lyngdoh, ki nonghikai bad ki nongtrei ophis na ka kolej bad ia kitei ki ar tylli ki kot la pynwandur bad pynbeit bniah bha da u Dr. David Arnold Kharchandy uba long u Secretary jong ka Centre for Historical Research Synod College.
U Myntri Rangbah ka Jylla u Conrad K Sangma ula ïaroh ïa ka Centre for Historical Research jongka Synod College halor ka jingshimkhia ban buh jingthoh ïa ka pateng jong ki nongprat lynti jong ka jylla.
Ula ban jur ia ka jingdonkam ban pynneh pynsah ia kum kine ki histori kum ka tynrai jong ka jingithuh bad jingai mynsiem, khamtam ia ki samla jong ka jylla Meghalaya.
Ka “His Story: Trailblazing Men of Meghalaya”, kadei ka kot kaba riewspah bha ha ki dur ba la kyrshan da ka jingai jingiarap ba kyrpang jong u Myntri Rangbah ka Jylla bad ka pyni ia ki jingthoh shaphang ka jingim jong ki laiphew hynniew ngut ki shynrang kiba kyrpang kiba la ai ki jingnoh synniang kiba thymmai ha ki bynta bapher bapher kum ka sain pyrthei, ka pule puthi, ka niam, ka jingshakri paidbah, ka jingiakhih na ka bynta ka mariang, ka kam shipai, bad ki kam shna jingshna.
Lyngba ki dur bad ki jingïathuhkhana kiba lah ban ïoh, ka kot ka long kum ka jaka buh jingthoh kaba paw bad kaba ai mynsiem ïa ka jingïaid lynti jong ka Meghalaya ha kane ka juk mynta.
Ka “His Footprints in Time: Meghalaya’s Trailblazers and the Making of Modern India” pat kadei ka kot kaba la lum lang ia ki laiphew san tylli ki jingthoh jong ki riewstad kiba wad bniah ia ka jingim bad ki pateng jong ki riewshimet kiba ka jingtrei jong ki kala pynwan dur ia ki jingiathuhkhana ha ka thain bad ha ka ri hi baroh kawei.
Ka kot ka kynthup ia ki jingthoh shaphang ki nongprat lynti kum u Purno A. Sangma, u Prof. G. G. Swell, u Rev. J.J.M Nichols-Roy, u Captain Clifford K. Nongrum, u Neil Nongkynrih, u Rev. Dr. Amos C. Moore bad kiwei kiwei. Ka kot ka shim na ki tyllong khubor ba la buh lypa, ki histori ba la kren da ka ktien, bad ki jingwad bniah ha ka lyngkha ban pyni ïa ka dur kaba bniah jong ka jingnoh synñiang jong ka Meghalaya sha ka jinglong ba mynta jong ka India.
Baroh ar tylli kitei ki kot ki ieng kum ki mawjam ha ka jingpule bad ki spah jong ka kolshor, kiba pynskhem biang ia ka jingaiti jong ka Synod College ia ka histori paidbah bad ka jingpynneh pynsah ia ki jingiathuhkhana jong ka thain bad la khmih lynti ba kin long kum ki lad jingiarap kiba kongsan na ka bynta ki samla pule, ki nongwad bniah, ki nongthaw polisi bad ki paidbah.
