Sam shithi thungkam ia 458 ngut ki Nonghikai LP ki skul Sorkar
Shillong, K’lyngkot 25: U Myntri Rangbah ka Jylla Conrad K Sangma bad u Myntri ka tnad Pule Puthi Rakkam A Sangma, hynne ka sngi Palei, kila pyllait ia ki kot NCERT ki ban pyndonkam da ka Meghalaya Board of School Education (MBoSE) ha ki skul jong ka Jylla naduh une u snem ba mynta.
Ia kine ki kot la pyllait ha ka Teachers Initiative Conclave, kaba long ha Harding Theological College, Tura ha ka jingiadon lang u MLA Rupert Momin, Sanjay A Sangma, Arbinstone Marak bad ki Heh Ophisar ka MBoSE bad ka Tnad Pule Puthi.
Ha kane ka Conclave, u Myntri Rangbah bad u Myntri ka Tnad Pule Puthi, kila aiti ruh ia ki shithi thungkam ia 458 ngut ki nonghikai LP ki skul Sorkar ba dang shu thungkam thymmai. Kane ka dei ka sien ba nyngkong ba kum kane ka jingthungkam kala jia hadien ba treikam ka roster system hapoh ka Jylla.
Ki shithi thungkam ia ki Nonghikai bala sam hynne ka sngi ki kynthup ia 94 tylli jong ka North Garo Hills, 66 tylli jong ka East Garo Hills, 67 tylli jong ka South West Garo Hills, 151 jong ka South Garo Hills, bad 80 tylli jong ka West Garo Hills.
“Kum ka Sorkar ngi la shimkhia ban pynjanai ia ka pule dangle ha ki jaka nongkyndong bad ka jingthungkam ia ki nonghikai kiab la biang ka kyrdan kan iarap bha ban kyntiew ia ka jinglehbha jong ki khynnah skul naduh ba ki dang khynnah bad kane kan pynjanai pat ia ka rukom ai jinghikai ha baroh kawei ka Jylla” ong u Myntri Rangbah haba ai jingkren ha ka Conclave.
Ula ong ba ka pule puthi ka dei kaba don hapdeng eh ban wanrah ia ki jingkylla bad ong “Ha kine ki san snem bala leit, ka Sorkar jong ngi kala pynleit jingmut bha bad jam shakhmat bad ka thong ban pyntyllun shaphrang ia ka Jylla”.
Haba kren halor ki sienjam jong ka Sorkar, u Myntri Rangbah ula ong “Ki san snem bala leit ki dei kiba la tynjuh bha ia ngi hynrei kum ka Sorkar, ngi la kut jingmut ban wanrah ia ka jingkylli na ka bynta ki briew jong ngi. Ngi la ong halade ban gin long kawei na ki 10 tylli ki Jylla ba hakhlieh duh hapoh ka Ri. Ngi la treikam da ka mission ban pynthikna ba baroh kin ioh iing, ka jingpynioh surok sha man ki shnong, ka um ha man ki thliew iing, ka mobile connection bad kiwei kiwei. Ka lynti jam bad ka jingmut jingpyrkhat jong ngi ka dei ban iapher, ban pynthikna ia kaei kaba bha eh ba ngin leh na ka bynta ki briew lajong”.
Ha kajuh ka por, u Myntri Rangbah ula ai khublei ia ki Nonghikai ba dang shut hung thymmai bad ong ba ki dei ban shim khia bha ia ka kam bad ban aiti lut ialade ha kaban iadonlang lang ha ki jingpynkylla kiba ka Sorkar kala wanrah na ka bynta ki nongshongshnong. Ula kren ruh halor ki sienjam bala shim ha kylleng ka Jylla ban pynbha ia ki jingtei ha ki skul, naduh ki LP, Secondary, Higher Secondary bad ki College.
Kiwei pat kiba la ai jingkren ki kynthup ia u Myntri ka tnad Pule Puthi Rakkam A Sangma, ka MP ka Tura Agatha K Sangma, u Swapnil Tembe, IAS, Director, School Education & Literacy, bad kiwei kiwei.
Ia kane ka Conclave la pynlong da ka Directorate of School Education & Literacy, Education Department, ka Sorkar Meghalaya.
 ha ki skul jong ka Jylla naduh une u snem ba mynta.){kind=link}