Shillong, Nohprah 2: U Myntri Rangbah ka Jylla u Conrad K. Sangma hynne ka sngi Baar, ula pyllait paidbah ia ka State-Level Youth Engagement Programme bad ong ba kadei ka sienjam kaba kongsan ha kaban pynkhreh ia ki samla ba kin noh synniang sha ka Jylla bad ban pyniaid shakhmat ha kaban kynjoh ia ka ioh ka kot kot da ki Billion Dollar.
Ia kane ka prokram la pynlong da ka Directorate of Sports & Youth Affairs ha NEHU Convention Hall, ia kaba la wan ban iashimbynta da u Myntri Sorkar uba khmih ia ka Sports & Youth Affairs u Bah Wailadmiki Shylla bad da ki spah ngut ki samla.
Haba kren ha ka jingialang u Conrad Sangma, ula banjur ia ka jingdonkam ban ai ia ka lad bad ia ki kabu na ka bynta ki samla ha kaba iadei bad ka kolshor bad ki jaka ki bapher bapher.
“Kum kine ki jingioh donbyntalang kin wanrah ia ka jingkylla kaba don jingmut ha ka jingim jong ki samla” ula ong.
Ula pynpaw ia ki jingthmu kiba ka sorkar ka don bad ka ong, ba ki kam kiba la sdang ban leh lypa ha ki snem kiba la dep kala ialam ia ka jylla Meghalaya sha ka bynta ban wanrah ia ka jingkylla. “Ka bynta kaban wan kan dei kaba ioh jingmyntoi da kaba shu kheit ia u soh” ula ong.
U Conrad Sangma ula ong, ba kane ka sienjam kan iaid shaphrang ban ia ka Exchange Programme kaba pynlong man la ka por bad kadei ban lap ia ki jingmut bad ki jingshem bathymmai jong ki samla.
“Ngi hap ban kynshew tyngka lyngba ki samla namar ba ki don ia ka bynta kaba kongsan bha ha kaban lah ban pynurlong ia ka ioh ka kot kaban kynjoh sha ka
$ Billion bad ngi don ia ka jingangnud halor katei” ula ong.
Kumba 70,000 ngut ki samla kila rung ha ki kam bapher man la ka snem, u Myntri Rangbah ula ong, ba ka jylla ka hap ban pyniar ia ki lad ha kaba iadei bad ka ioh ka kot bad ula kdew ba ki prokram kum ka DREAM, Early Childhood Development, Skilling and Entrepreneurship, CM Elevate, YESS Meghalaya bad Hello Meghalaya kidei shi bynta jong katei ka jingpyrshang,
U Myntri ka tnad ialehkai u Bah Wailadmiki Shylla ula ong, ba ka exchange programme ka long kaba kongsan bha bad khamtam ban leit jngoh ruh shabar ka Jylla bad ban pynbha ia ka jingiadei bad ka Jylla Meghalaya. Ula kyntu ia ki nongiashimbynta ba kin shim ia kane ka kabu ban ioh jinghikai bad ban tei ia ka sap jinglong nongialam ka jongki.
Hapoh jong kane ka sienjam, 24 ngut ki nongjop ha ka jingiakob ha ka State-Level kin leit sha Malaysia bad Philippines. Kiba wan baar kin leit ban jngoh ia ki jaka bapher bapher hapoh jong ka ri India kiba iadei bad ki kam ki jam kiba don jingiadei bad ki samla.
