Shillong, Nohprah 02 : U Myntri Rangbah ka Jylla Conrad K Sangma ula kyntait ia ka jingkynnoh jong ka Congress ba ka Sorkar Jylla kala ialam ia ka Jylla sha ka jingkitram kit shah, da kaba ong ba ka jingkam jong kane ka party ka dei kabym don nongrim bad ba ialam bakla.
“Nga la batai ia kane la bunsien. Nga la pyni ia ka jingkiew ka roi ka par ka Jylla” ong u Conrad haba ban jur ba ka jingshim ram jong ka Jylla ka dei kaba la leh hapoh u pud bala buh da ka Sorkar Pdeng bad ka Reserve Bank of India (RBI).
U Conrad ula pynshai ba ki ram ba shim na ka World Bank bad ADC ki dei kiba la phiah 90:10 lane 80:20 ha kaba ka Sorkar Pdeng kala siew ia kaba bun.
“72% la siew biang da ka Sorkar Pdeng, 28% la siew biang da ka Sorkar Jylla. Kumta, ka jingkylli ba la bei tyngka lyngba ki ram ki shah kam mih satia haei haei ruh” ula ong haba bynrap ba ka Congress kala ialam bakla ia u paidbah.
U Myntri Rangbah ula kyntu ia ka Congress ba kan sngewthuh ia ka rukom pyniaid pisa jong ka Jylla hashuwa ba kan ai kano kano ka jingkynthoh, haba ong ba ki jingpyrshang jong ki ban pynthohbria ia ki khana ka roi ka par jong kane ka Sorkar kim shym la treikam satia.
“U President ka MPCC u pyrshang ban ialam bakla ia ki paidbah..kane ka long kaba sngewsih bha. Kila iohi ia ka jingkiew shaphrang ka Jylla bad kila pyrshang ban wad ia ki lad ki lynti ban ialeh ban tan ia kane ka jingkiew shaphrang bad kumta kila ialam bakla ia ki paidbah. Nga kwah ban kyntu ba ki dei ban sngewthuh ia ka rukom pyniaid pisa hashuwa ba kin kren bad ai kano kano ka jingkynthoh” ula ong.
