Pyllait u CM ia ka Sports Scholarship bad pynkup burom ia ki Nongkhur takma na ka NE Olympic Games

By
Ka Shlem
-
0
24

Shillong, Nohprah 02 : U Myntri Rangbah ka Jylla Conrad K Sangma hynne ka sngi palei, ula pyllait paidbah ia ka Sports Scholarship Scheme bad pynkup burom ruh ia ki nongialehkai ba khur takma bad ki coach na ka lympung ialehkai North East Olympic Games 2022 ha Soso Tham Auditorium, Shillong.

“Kane ka Scholarship Programme bala sdang mynta ka sngi ka dei ka jingai baibam ba manla u bnai bad ia ka pisa yn sa phah sha ki Bank Account jong ki nongialehkai, ka jingthmu ka long ba mano mano ba ioh ia ki takma na ki lympung ialehkai ka thain lane ki National level, ka Sorkar kan ai ym tang ia ka song pisa ba shisien ar hynrei ia ka baibnai kum ka baibam ba kin kyrshan ialade bad kin lah pyndonkam hala ki jingdonkam bapher bapher. Ka dei ka jingai ia ki nongialehkai ba kin lah ban ialehbha shuh shuh” ong u Conrad.

“Kane ka jingai song pisa kan sdang naduh kane ka NE Olympic Games bad baroh ki nongioh takma kiba la pynkup burom mynta ka sngi kin sa ioh ia ka baibam. Kane ka lah ban dei ka song pisa barit hynrei kan iarap pat ia ki ba kin bteng ban leh ia kano kano ka kam ba ki sngewtynnad ban leh” ula bynrap.

Lah ban kdew ba haduh 188 ngut ki nongialehkai kila iashimbynta ha ka North East Olympic Games 2022 na ka Jylla bad haduh 54 ngut ki dei ki Officer. Ka Jylla kala wan ha ka kyrdan ba 4 da ka jingioh khubor haduh 149 tylli ki takma, tang lai tylli hadien ka Arunachal Pradesh kaba wan balai.

Ka Meghalaya kala ioh khur haduh 36 tylli ki takma ksiar, 35 tylli ki takma rupa bad 78 tylli ki takma rnong.