Shillong, Lber 14: U Myntri Rangbah ka Jylla Conrad K Sangma hynne ka sngi Palei, ula pyllait paidbah ia ka Meghalaya Industrial and Investment Promotion Policy (MIIPP), 2024 bad pyntip ba ka Sorkar kala iasoi ia ka Memorandum of Understanding bad ki kompani shimet ban sengkam ha Jylla ha ka jingmang pisa ba kot T. 2,9,57 klur.
Haba iakren bad ki lad pathai khubor, u Conrad ula iathuh “Khyndai tylli ki MoU la iasoi ha kane ka shitaiew bad kine ki kynthup ia ki kam bapher bapher kum ka kam jngohkai sha ka jingshna jingbam (food processing), ka technology, Pharmaceutical bad ruh ki jingdih. Kumta, baroh kine ki jingkynshew pisa bad ka MoU ba T. 2957 klur lah dep ban iasoi hadien ba la pyntreikam ka Policy”.
“Ha ka jingshisha, mynta ka sngi ngi la iasoi sa artylli ki jingtyrwa bad kawei ka dei bad ka Varun Beverages kaba dei ka kompani ba pyniaid ia ki karkhana pynmih Pepsi ha kylleng ki jaka ka Ri. Kumba T.180 klur yn kynshew da ka Pepsi ban buh ia ka Pepsi Plant ban shalan ia ka Pepsi bad kiwei kiwei ki mar ha Meghalaya bad kumjuh ruh sha kiwei ki jaka jong ka Ri khamtam ha North Bengal bad kiwei ki bynta jong ka Assam” ula ong.
U iathuh ba ia ka MoU sa iasoi ruh bad ka North East United Football Club ba kan seng ia ka Residential Football Academy ba nyngkong eh ha Mawkhanu.
“Kumba phi tip u John Abraham dalade ula don hangne mynta. Ula leit khmih ia ka jaka kaba ka Sorkar kan ai sha u ha kaban seng ia ka North East United Residential Training Football Academy” ula ong.
Ki kompani kila la iasoi MoU ba kular ban kynshew pisa ha Meghalaya ki kynthup ia ka Ramky Infrastructure Ltd (T.2000 klur ), Polo Towers Group (T. 465 klur), Sonar Bangla Group (T.90 klur), Quadra Infratel Synergies Pvt Ltd (T.100 klur), Seven Sister Resources (T.1 klur), Playmaker Labs (T.1.2 klur), AI Genix (T.100 klur), Lallooji & Sons (T.100 klur), bad ka Varun Beverages Ltd (T.100 klur).
U Myntri Rangbah u pyntip ruh ba ka Sorkar Jylla ka angnud ban wanrah sa kumba T.8,340 klur ka jingkynshew kam lyngba ki reimbursement ba T.700 klur bad ka SGST sha kiba wan sengkam.
U Conrad ula ong “Khnang ban kynjoh ia ka 10 billion US dollar economy, ngi lah khein jingkhein ba ngi donkam duna eh ia ka 1 billion dollar ha ka jingkynshew kam ki kompani shimet kaba ngi hap ban ioh, bad kane kan sa nang bynrap ia ka thong ba 10 billion ba ngi la buh”.
“Ka Sorkar Meghalaya kan pynlut bad mang pisa kumba T.700 klur ban ai kum ki jingmyntoi sha ki kompani bapher bapher ki ban wan sengkam ha Jylla” ula ong.
U Conrad ula pyntip ba palat 50,000 tylli ki kam kin sa lait ha Meghalaya lyngba ka jingpyntreikam ia kane ka Industrial Policy ba thymmai. Kane ka jingpynkha kam kan long ruh nalor ki 40,000 tyli ki kam ki ban pynmih n aka CM Elevate Program.
Kane ka Policy ka phaikhmat eh sha ka jingaikam ia ki samla trai shnong namar ka kren shai ba ki nongsengkam kin hap aikam ia ki nongshongshnong ka Meghalaya ba kin ioh ia ki jingmyntoi bala tyrwa hapoh ka Policy
