Wan ba-ar ka EKH ha ka jingdon bun eh ki nongpang bampong ha ka Ri
Shillong, Jymmang 31 : U Myntri Rangbah ka Jylla Conrad K Sangma, hynne ka sngi Balang, ula pyllait paidbah ia ka Meghalaya Cancer Care lane ‘Meg Can Care’ project ban leh screening bad ban lap kloi ia ka jingpang bampong, kum shibynta na ka jingiakhun pyrshah ia ka jingpang bampong ha ka Jylla.
Ia kane ka project la pyllait paidbah ha ka jingialang bala pynlong ha U Soso Tham Auditorium, Shillong ha ka jingiadon lang ka Myntri ka Koit ka Khiah Kong Ampareen Lyngdoh. Kane ka prokram ka dei ka kam bala wanrah da ka Sorkar Meghalaya ha ka jingiatrei lang bad ka Appollo Telemedicine Foundation bad ka World Economic Forum.
Haba ai jingkren ha ka jingialang, u Myntri Rangbah Conrad K Sangma ula ong ba ka Jylla Meghalaya bad khamtam eh ka East Khasi Hills District ka dei kaba wan ba-ar ha ka jingdon bun eh ki nongpang bampong hapoh ka Ri.
“Haba phai sha ka esophogus cancer (bampong ki snier), ngi la wan ba nyngkong eh bad kane ka dei ka jingeh ba khraw bha bad ta ka daw ka Sorkar, ka Imlang sahlang bad baroh na ngi, ngi don ia ka jingbahkhlieh ha ka tyrpeng jong ngi ban peit ba ka jingdon jong ki nongpang bampong ha Jylla kan hiar noh bad ban pynthikna ruh ba ki jingim (mynsiem briew) kin ioh jingiada bad ka rta ban im jongki nongshongshnong ruh kan kham heh” ula ong.
U Conrad ula pyntip ruh ba ka sienjam ba ka Sorkar kala shim halor ka koit ka khiah u briew ka long da kaba khmih ia ka shirta jingim jong u briew kaba long naduh kaba pun ha kpoh bad kam dei tang ban ai jingsumar ynda u briew ula kem pang.
“Ka Koit ka Khiah jong u briew ka sdang naduh ka por ba dang pun ha kpoh bad hadien ka shaniah tylli ha ka rukom im pat jong une u briew” ula ong.
U Myntri Rangbah ula pyntip ba ka mang tyngka bala mang shisnem sha ka koit ka khiah ha Meghalaya kala long arshah ha kine ki khyndiat snem bala leit noh. Ula ong b aka Meg Can Care Program ka dei ka sienjam kaba khraw bha jong ka Tnad ka Koit ka Khiah khnang ba kan lah ban wanrah ia ka jingkylla ba shisha.
“Ngi hap ban sngewthuh ba kaba bun ka bynta jong ka koit ka khiah u briew ka wan na ka rukom im bad ka jinglap kloi ia ki jingpang ym tang ka jingpang bampong hynrei kiwei kiwei ki jingpang bad nga kyntu ia ki Nongshongshnong ka Jylla khamtam na East Khasi Hills ba ngi donkam ban shimkhia bha ia kane bad lada ngi lap kloi ia ka jingialang, kumba 80% na ka jingpang bampong ka dei kaba lah ban pynkoit…namar kata ka longkaba donkam ban leh screening bad ban lap kloi ia ka jingpang” ula ong.
U Myntri Rangbah ula pyntip ruh ba ka jingleh screening kat kum kane ka prokram kan dei kaba iaid kat kum ka juk ba mynta bad ka ban leh da ki briew kiba tbit haba kyntu ia ki nongshongshnong ban shim kabu ia kane ka prokram ban lap kloi lada ki don ia kano kano ka jingpang.
Shuwa kane, u Principal Secretary ka Tnad ka Koit ka Khiah Sampat Kumar ula pyntip ba tang 16 % na ki nongpang bampong ki tip b aka don ka jingleh screening ia ka jingpang bampong.
“Kiba byn ki briew kim tip ba ia ka jingpang bampong lah ban leh screening bad lada lap kloi, 80 % na ka jingpang lah ban pynkoit” ula ong haba pyntip ba palat 10 % na kiba iap ha ka Jylla ka dei namar ka jingpang bampong.
Ha kane ka sngi, u Myntri Rangbah ula pyllait ruh ia ka Cancr Helpline Number 14410 bad khniot ia u 5 ban ioh iaki jingtip halor ka bampong. Ula pyllait ruh ia ka Cancer Ambassador Cyclist.
