Shillong, Risaw 01 : U Myntri Rangbah ka Jylla Conrad K Sangma ha ka sngi Ba-ar, ula pyllait paidbah ia ka GREEN Meghalaya Plus scheme haba ban jur ia ka jingdonkam ban pynbiang tarajur ia ka roi ka par bad ka jingiada bad pynneh pynsah ia ka mei mariang.
Ka GREEN lane Grassroot Level Response Toward Ecosystem Enhancement and Nurturing, ka dei kaba la pynshong nongrim halor ka nongim jong ka Payment for Ecosystem (PES) ne jingsiew pisa ban iada mariang, kyrshan ia ki shnong ki thaw, ki Kur ki Jait, lane ki riew shimet kiba aiti ialade ban pynneh pynsah bad iada ia ki khlaw la kumno kumno ruh kaba duna eh ka long 30 snem.
Haba kren ha ka jingpyllait ia ka skhim, u Myntri Rangbah ula ong “Ka dei ka jingmyntoi ia ki paidbah, ka imlang sahlang bad ka pyrthei ba ka PES prokram ka dei ia kaban pyntreikam hapoh ka Ri bad ka pyrthei. Ka dei kaba donkam bha mynta”.
“To, ngin iada ia ki khlaw hashuwa ba kin julor, ym ban pynim biang ia ki hadien ba kila julor. Kane ka dei ka jingmut jong ka GREEN Meghalaya bad ngi da sngew sarong ia kane ka flagship programme. Ta ka daw ngi kwah eh ban wanrah sa ia ka ‘GREEN Meghalaya Plus’, ka ban dei kawei pat ka prokram kaba kongsan bha” ula bynrap.
Kawei na ki jingkylla kaba bun eh ha ka PES 2-0 guidelines ka dei ka jingpynheh ia ka jaka ban iashimbynta ha ka jingiada ia ki khlaw. Ha ka PES ba nyngkong, ka jaka khlaw ba donkam kaba duna eh ka long 2 hectare hynrei ha kane ka kyndon ba thymmai, la pynduna sha ka 1 hectare, kaba ailad ia ki trai jaka bad ki shnong ki thaw ba kin ioh ia ka skhim. Kane kan pynthikna ba ka jingmyntoi jong ka skhim kan leit sha kham bun ki briew bad kan synniang bha ha ka jingiada bad pynneh pynsah ia ki khlaw ha Jylla.
“Kam dei tang shaphang ka mariang kaba ngi kren hangne. Ka jingiada ia ki khlaw ka long kongsan bha ia ngi wat na ka jingsngew jong ka Finance Commission” ong u Conrad haba pyntip “Ha ka jingiakren ia ka jingsam ia ka bhah khajna jong ka Sorkar Kmie bad ki Jylla, kaba dei ka kam kaba ka Finance Commission ka leh, ka jingdon ki khlaw ka dei kaba kongsan tam ha ka jingkhein ban ioh ia ka khajna jong ka sorkar kmie. Ngi la ai pisa ban pynkhlain ia ki jingiada ne pynneh pynsah ia ki khlaw jong ngi, ym tang ban pynthikna ia ka mariang kaba jyrngem hynrei kan wanrah ruh ia ka jingmyntoi ha ka liang ka jingioh pisa”.
Ha kane ka jingialang, u Myntri Rangbah ula iakren ruh bad ki nongioh bynta jong ka GREEN Meghalaya +, CM ELEVATE bad ka FOCUS.
Uwei u nongioh bynta na South West Khasi Hills ula jingkren ia ki jingmyntoi ba u ioh na kine ki prokram ka Sorkar bad pynpaw ia ka jingsngewnguh ia ka Sorkar Meghalaya namar ka lad ban ioh jinghikai halor ka jingthung dieng bad jingiada ia ka mariang lyngba kine ki sienjam ba ka shim.
U Myntri Rangbah ula sam ruh ia ki cheque bad ki sanction letter sha ki nongioh bynta jong ka FOCUS, CM-ELEVATE bad ka GREEN Meghalaya +.
Lah ban kdew ba ka CM-ELEVATE Phase-1 bad 2, kala ai jingmyntoi ia 2281 ngut ki briew da ka jingmang pisa haduh T. 60 klur katba ka FOCUS kala kyrshan ia 3777 ngut ki nongioh bynta da ka song pisa ba kot T.17.59 klur.
