Shillong, Rymphang 15: U Myntri Rangbah ka Jylla Conrad K Sangma ha ka sngi Palei, ula pyllait paidbah ia ka prokram “CM Connect” ka ban ailad ia ki Nongshongshnong ba kin lah ban iaken ha kano kano ka por bad ka Sorkar Jylla.
Lyngba kane ka rynsan, ki Nongshongshnong kin hap ban shu phone ha u helpline No. 1971 ban pynsngew iala ki jong ki jingeh bad ki jingdonkam, ia kaba ka Sorkar kan sa leh eiei.
Kane ka prokram ka dei ka khun jong u Myntri Rangbah ka Jylla, uba la trei shitom ban pyniadon bynta lang ia baroh ki Nongshongshnong ha ka jingtreikam jong ka Sorkar Jylla. Kane ka rynsan kan ailad ruh ia ka Sorkar ba kan sngewthuh ia ki jingai ia ki skhim, ki jingtreikam jong ki jingshakri bapher bapher bad ki kam pynroi bala pyntreikam hapoh ka Jylla.
“Kane ka rynsan kan ailad ia ki paidbah ba kin lah iakren bad buh jingkylli sha ka Sorkar bad ka Sorkar kan sngap bad jubab bad ban leh eiei ruh ia ki jingeh ba ki don” ong u Myntri Rangbah haba pyllait paidbah ia kane ka prokram kaba la long ha Convention Centre ka North Eastern Hill University (NEHU), Shillong Campus.
Kum shibynta jong kane ka prokram, ka Sorkar kala buh ia ki Ophisar na ki Tnad bapher bapher ba kin khmih bad jubab ia u paidbah kat kum ka por bala buh. Ki paidbah ki lah ruh ban iakren bad ka Sorkar lyngba ki rynsan Social Media ba kynthup ia ka Whatsapp. Kane ka helpline 1971 kan treikam naduh ka por 8 baje mynstep haduh 8 baje mynmiet ha ki san tylli ki ktien ba kynthup ia ka Khasi, Jaintia bad Garo.
U Myntri Rangbah ula pyllait ruh ia ki prokram bapher bapher kum ka MegARISE, Meghalaya State Organic Mission 2.0 bad sam ia ka song pisa hapoh ka Green Meghalaya bad ka FoCUS. Ula pyllait ruh ia ki project ba iadei bad ka bha ka miat ki nongrep, ka rep ka riang bad ka jingsumar ia ka mariang kaba kot haduh T. 400 klur.
Ka MegARISE ne ka jingiada ia ki Catchment Area ba don jingma ha Meghalaya, ka dei ka project ban pyntyllun shakhmat ia ka State Water Policy. Ia kane ka project yn pyntreikam da ka song pisa ba T. 344 klur.
Ka Meghalaya State Organic Mission 2.0 ka don ia ka thong ban pynkylla ia 100,000 hectare ka jaka sha ka National Programme for Organic Production (NPOP)-certified organic cultivation hapoh u 2029 bad ban pynioh kamai ba arshah ia ki nongrep lyngba ka jingnang pynbun ia ka jingpynmih marrep, pynheh ia ka dor bad ban pynmih ia kiwei kiwei ki marbam na ki marrep.
Ha kane ka prokram, u Myntri Rangbah ula plie paidbah ruh lyngba ki kor internet ia ki 12 tylli ki processing unit bad 3 tylli ki cold storage ha kylleng ka Jylla kiba la pyntrei hapoh ka Meghalaya NEXT. Ia kine ki Unit la ai longtrai bad pyniaid da ki kynhun ki nongrep kiba la thaw da ka thong ba kin iarap ban pynioh jingmyntoi kat kaba lah ia ki nongrep na ki mar rep ba ki pynmih khlem da pynsep ei kai ia ki marrep.
