Nongpoh, Rymphang 15: Ki paid Karbi ka Assam, kila pyni ia ka jingshlur ban kyntur shapoh u pud u sam ka Jylla Meghalaya khlem ka jingsalia ia ki bor ka Ain bad kane ka paw na ka jingmait lynti thymmai ia ka Wah Umiam hapoh ka Shnong Amphreng, Ri-Bhoi District ban ioh kyntur bad khlong be-ain ia u shyiap na kane ka Wah.
Kane ka kam ki paid Karbi kala paw pyrthei na ka jingleit ujor jong ka Khasi Students Union, Umden Circle hynne ka sngi Palei hakhmat u Deputy Commissioner ka Ri-Bhoi Arpit Upadhyay.
Ka KSU, Umden Circle bala synran da u President ka KSU North Khasi Hills Bah Ferdinald Kharkamni, kila leit buh ia kane ka jingujor hadien ka jingleit jurip ban pynthikna ia kane ka kam beain ki paid Karbi na Assam, ha kane ka Wah.
Kat kum ka jingiathuh ki Nongialam ka KSU, kane ka jingmait lynti thymmai ia ka Wah Umiam kala jia ha ka shnong Amphreng ka ba hap hapoh ka Raid Lymphuid, Khyrim Syiemship bad ka dei ruh ha ka jaka shimet jong u Rangbah Shnong ka shnong Amphreng.
Haba kren sha ki lad pathai khubor, u President ka KSU Umden Circle samla Toning Lapang, ula iathuh ba ki paid Karbi kila pyndonkam da ki kor JCB ban khlong lynti thymmai ia ka um bad ban tih ia u shyiap na ki jaka bala pynrngad ia ka wah.
Ula pynrem jur ia kane ka kam be-ain bad dawa ia u Deputy Commissioner ba un tuklar mar mar ia kane ka kam lem kumta ka Seng kan shim hi da la lynti kaba tyngeh.
Ula iathuh ba u Deputy Commissioner ula kular ban shimkhia mardor ia kane ka kam bad ban iakren ruh ia u Superintendent of Police lem bad ia u District Forest Officer ba kin leh eiei noh mardor.
