Shillong, Nohprah 06: U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem, hynne ka sngi Balang, ula pyllait paidbah ia ka trok kit niut (waste collection truck) bad ka painkhana paidbah ha Hima Mawphlang
Ia kane ka trok kit niut la thied da ka song pisa jong ka skhim bala mang na ka 15th Finance Commission tied Grant 2020-21.
Ha kane ka program la ia don lang ruh kiwei Ki EM, u MLA, U MLA-MDC ka Nongstoin Constituency, u Lyngdoh ka Hima Mawphlang bad ki nongshong shnong ka Hima Mawphlang.
Ia kane ka truck la ai sngewbha khamtam eh ia ki briew kiba shong iew ha Iewduh Mawphlang bad ka Iewduh Tyrsad ban pynsuk bad ban pynneh ia ka khuid ka suba ha kine ki iew bad kumjuh ruh ia ka painkhana paidbah kaba la shna kyrpang ym tang ia ki shynrang bad kynthei hynrei ruh ia ki briew kiba duna dkhot met.
“Ngi la shna ia ka Solid Waste Management rule bad shen kane ka rule kan sa treikam noh ha man ki shnong bad man ki dong ha kine ki 5tylli ki district bad ha kane ka rule yn ai bor ia ki nongialam shnong ba ki lah ban dain kuna ia kino kino ki nongshong shnong kiba pynkhein ia kane ka ain kaba la pyrrkhing ban bret pathar ia ki jaboh jabain kat shaba lap” la pynbna u CEM.
Shuh shuh u la bynrap ba ha ka jingialam jong u Myntri Rangbah Duh ka Ri u Narendra Modi, ka Sorkar pdeng ka la mang kyrpang ia ka song pisa sha ki District Council ba kin pyntrei kam ia ki skhim pynroi ha ki shnong ki thaw haba bthah ruh ba 60% na kane ka skhim ka dei ban leit sha ka khuid ka suba.
Haba kren halor ka Monolith Festival, u CEM ula ong “Na ka liang ka District Council ngi la rai ban pynlong biang ia ka Festival. Ka jingthmu jong kane ka long ban pyni sha ka pyrthei ia ka jingriewspah ka riti ka dustur jong ngi” ong u Pyniaid Sing Syiem.
Ha kane ka juh hi ka sngi la pyllait paidbah ruh ia ka public Ambulance transport da u MDC bad Chairman ka KHADC, u Lamphang Blah kaba la ai sngewbha da ka Khasi Hills Community REDD+ Project bad ka Synjuk Hima Arliang Wahlang Umiam Welfare Society ha ryngkat ka jingiadonlang u General Secretary ka synjuk, u Tambor Lyngdoh.
