Shillong, Jylliew 13 : Ka Sorkar Pdeng kala pyllait ia ka song pisa ba T. 180 klur ban pyntreikam ia ka Dam Rehabilitation and Improvement Project (DRIP) ha Jylla Meghalaya.
Ka pung Umiam ka dei kawei na ki Dam hapoh ka Ri kaba la shah kynthup lang ha ka jingpynbha bad pynkhlain hapoh ka DRIP jong ka Sorkar Pdeng.
“Ha ka Phase-I, ngi la ioh ia ka mang pisa ba T. 180 klur ha kaba ngi lah dep khot tender kumba T. 15 klur” ong u Sanjay Goyal, Managing Director ka Meghalaya Energy Corporation Limited haba iakren bad ki nongthoh khubor hynne ka sngi Ba-ar.
Ula ong ba ka DRIP ka khmih ym tang ia ka jingshngain jong ki Dam hynrei ki khmih ruh ia kiba bun ki bynta kum ka rta jong ka Dam, kiei ki jingdonkam ba hap ban leh ha kaban pynbun ia ka rta jong ka Dam. Ka dei ka buit jingstad saian kaba ka Sorkar India kala shim.
“Ka jingthmu hi ka long ba ha kane ka project, ngi khmih ia ka jingshngain bad ka jingynkhlain ia baroh ki jingtei kiba iadei bad ka Dam” ula ong haba bynrap “ ia kane ka project la hap ban pyntrei tad haduh u 2025 bad nga thikna ba ngi dang don bun ka por ban pyntrei ia kine ki kam baroh”.
U Managing Director ula pyntip ruh ba artylli ki song hapoh ka DRIP ki dei kiba la dep ban pynkhreh nadong hadong katba kiwei kiwei ki song jingtrei la phah sha ka Ministry ba dei khmih ba kan ai jingbit haba ong “Mar syn ioh ia ka jingbit, ngin sa pyntrei noh shaid shaid ia ka kam”.
Haba phai sha ka pung Umiam, u Goyal ula ong ba kat kum ka jingwad bniah da ki kynhun agency bapher bapher, ka jingkieng jong ka Dam ka long kaba shngain ia mynta.
Pule lang ia kane: Pyntip ka MeECL ban nang khate ia ki kynta pynlip bording lada dang bteng ban hap slap
