Shillong, Lber 18 : Ka Sorkar India kala pyllait biang sa shisnem ia ki College ka Jylla Meghalaya, kiba iasoh bad ka North Eastern Hill University (NEHU), na ka jingtreikam jong ka Common University Entrance Test (CUET) kata jong u snem 2023-2024.
Ka Ministry of Education kala pynjlan ia ka jingbym treikam ka CUET ia baroh ki College kiba hap hapoh ki Central University jong baroh ki Jylla ka Thain Shatei Lam Mihngi bad kumjuh ruh jong ka Uttarakhand, da kaba pynshong nongrim na ka jinglong lum jong ki jaka, ka jingbym biang ki lad pyniasoh digital bad kiwei kiwei ki jingdonkam.
Ha ka shithi sha u Secretary ka University Grants Commission ba 15 tarik Lber, 2023, u Under Secretary ka Sorkar India u PK Singh ula thoh “ …Namar ka jinglong jong ki jaka, ka jingjngai, ka jingbym biang ki lad pyniasoh kor digital bad kiwei kiwei, kala buh jingeh ban pynlong ia ka CUET ha ka thain Shatei Lam Mihngi, ki Central University jong ka thain kum ka Sikkim University, Rajiv Gandhi University, Manipur University, Assam University, Tezpur University, Nagaland University, Tripura University, Mizoram University, NEHU bad HNBGU, Uttarakhand ki dei ban pynrung klas ia ki samla pule sha ki college ba pyniasoh bad ki kat kum ka rukom ba ju leh baroh shikatta ha ka jaka jong ka CUET kumba leh ha u 2022-2023. Namar kane ka jinglong jingman, la rai ban pynjlan sa shisnem kata 2023-2024”.
Ula bthah ruh ia ka UGC ban pynmih ia ka jingpynbna halor kane ka jingbthah.
Lah ban kdew, u Myntri Rangbah ka Jylla Conrad K Sangma, ula thoh sha u Myntri ka Pule Puthi ka Sorkar Pdeng u Dharmendra Pradhan ha ka 7 tarik Lber, 2023, ba kyrpad ban pyllait ia ka Meghalaya na ka jingpynlong ia ka CUET.
Ula kdew ba ka jingpynlong ia ka elekshon MLA dang shen kala lam sha ka jingslem ban pynlong ia ka State Board Exam bad kane kala buh jingeh ia ki samla ban ialeh ia ka CUET na ka bynta ban leit pule ha ki jaka pule jong ka kyrdan Undergraduate.
U Myntri Rangbah ula pyntip ruh ba ka Sorkar Jylla kala shim ia ka sienjam ban thaw noh ia ka State University bad shen un sa ioh ia ka jingmynjur na u Lat ka Jylla.
Ha u bnai Jymmang 2022, ka Sorkar kala mynjur ban pyllait ia ka Meghalaya na ka jingpynlong ia ka CUET halor ka jingkyrpad jong u Myntri Rangbah ka Jylla.
