Shillong, K’Lyngkot 04: U Myntri ka tnat PHE u bah Renikton Lyngdoh Tongkhar hynne ka sngi ula iathuh ba ka tnat Jaal Shakti ka Sorkar pdeng, kala mynjur ban pyllait sa T. 438.43 klur naka bynta ban pyntreikam iaka skhim Jal Jeevan Mission ha ki shnong ba don ha ki thain sor.
Haba kren sha ki lad pathai khubor u bah Renikton ula pyntip ka tnat Jal Shakti sorkar pdeng kala mynjur iaka sorkar pisa ba T.438.43 klur naka bynta ban pyntreikam iaka JJM ha ki 8 tylli ki shnong kiba kynthup ha Mairang, Nongpoh, Mawlai, Nongkseh, Umlyngka, Umpling, Mawpat, bad ha Lahsohtun.
U bah Renikton ula iathuh ba iaka skhim JJM ha Mairang la mang haduh T. 118.77 klur, ha Nongpoh T. 103.71 klur, ha Mawlai T. 95.38 klur, Nongkseh T. 15.84 klur, Umlyngka T. 28.8.9 klur, Umpling T. 37.07 klur, Mawpat T. 28.08 klur bad ha Lawsohtun T. 10.69 klur.
“Nga dang da ka jingkmen ba ka tnat Jaal Shakti sorkar pdeng kala mynjur ban pyntreikam iaka skhim JJM ha ki shnong ba don ha ki thain sor bad kane ka jingmynjur ka sorkar pdeng iaka song pisa kaba palat T.438.43 klur kadei ruh ka jingai sngewbha snem thymmai ia ki paidbah ka Meghalaya” la ong u bah Renikton.
U bah Renikton ula iathuh ba naduh ba ka sorkar pdeng kala pyntreikam iaka skhim JJM, kum u myntri ka tnat PHE ula iakren bun sien bad u myntri ka tnat Jaal Shakti ban pyntrei ruh ia kane ka skhim ha ki shnong ba don ha thain sor bad kane ka rai jong ka sorkar pdeng ka long ka jingjop ia ka jylla Meghalaya.
Ula bynrap ba haka jingshisha ka skhim JJM kadei tang naka bynta ki shnong ha ki thain kyndong (Rural) hynrei mynta ka kynti lyngba ka jingmang pisa kaba T.438.43 klur, lah ban ong ba ia ka skhim JJM la lah ban pyntrei ruh ha ki shnong thain sor naka bynta ban pynbiang um dih ha man la ki tyllong ïng.
Haba iadei bad ka jingpyntrei iaka skhim JJM ha ki thain kyndong (Rural) naka liang u myntri ka tnat PHE u bah Renikton Lyngdoh Tongkhar ula pynti ba haduh mynta ka jingpyntrei kala iaid palar 45% bad kumba 2.80 lak tylli ki longïng kila ioh um bam bad naka liang ka sorkar jylla ruh lyngba ka tnat PHE kala dep ban mang haduh 5,89,888 tylli ki longïng ha baroh kawei ka jylla ki ban ioh jingmyntoi lyngba kane ka skhim.
