Shillong, Lber 07 : U Myntri ka Tnad Revenue & Disaster Management Kyrmen Shylla ha ka sngi Thohdieng ula pyntip ba ka Sorkar kala pyllait haduh T.19 lak kum ka jingiarap song pisa sha ki Longiing kiba shah ktah na ki 29 tylli ki jingjia pluh ding hapdeng u snem 2024-25.
“Ka Tnad kala pyllait ia ka song pisa kat kum ki kyndon ka SDRF” ong u Bah Kyrmen haba jubab ia ka jingkylli bala wanrah da u MLA ka VPP na Mawryngkneng Bah Heaving Stone Kharpran ha Iingdorbar.
Shuwa kane, u Bah Kyrmen u pyntip ba ka Sorkar kala ai ia ka jingiarap song pisa ba T.1.30 lak sha ka Kong Midaris Pde jong ka Shnong Kut kat kum ki kyndon ka SDRF.
“Ym shym la ai jingiarap song pisa sha ka Kong Riburom Kharrngi ba na Puriang. Hynrei, ia ka song pisa ba T.1.30 laj la ai kum ka jingiarap sha ki trai jong ka Iing Kong Helpmer Kharrngi” ula ong.
Haba jubab bynrap, u Myntri Rangbah Conrad K Sangma ula ong ba ki kyndon ka SDRF kila kren shai bha bad haba pynshong nongrim ha kane, la shim ia ki sienjam ban iarap haba shah kylli la ka Sorkar kan dang ai shuh shuh ia ka song pisa.
U Conrad ula ong ba ki MLA ruh ki lah ban ai ia ka jingiarap song pisa lyngba ka skhim SRWP lane ka Discretionary Grant.
