Shillong, Rymphang 03 : U National Vice President ka National People’s Party (NPP) bad Myntri Rangbah ka Jylla Conrad K Sangma, hynne ka sngi thohdieng, ula pyllait paidbah ia ka mat ban pyntreikam hadien ka elekshon (election manifesto) jong ka NPP sha ka elekshon MLA-2023 kaba ai kyrteng : People’s Document-Vission 2023-2028.
Ia kane ka manifesto la pyllait paidbah ha ka rally ialap elekshon jong ka NPP kaba long ha Jowai ha ka jingiadonlang u National Vice President bad Symbud Myntri Rangbah ka Jylla Bah Prestone Tynsong, MLA ka Nartiang ma Sniawbhalang Dhar, MLA ka Raliang ma Comingone Ymbon, MLA ka Jowai Wailadmiki Shylla, kyrtong ka NPP na East Shillong Dr Ampareen Lyngdoh bad kiwei kiwei ki Nongialam ka Party, kaba la wan iashimbynta ruh da ki hajar ngut ki paid nongkyrshan jong ka Party.
NPP has shown its potential in the last 5 years. Our people first mission is bringing the change we have envisioned for Meghalaya. We urge the people to trust Meghalaya’s own National Party so that together we can achieve new milestones for our State. pic.twitter.com/DBGBsyt6y6
— Conrad K Sangma (@SangmaConrad) February 3, 2023
Kane ka manifesto ka kren bniah halor ki kam ban sa pyntrei (vision document) da ka NPP na ka bynta ki paidbah ka Jylla Meghalaya na ka bynta u snem 2023-2028, kaba pynleit jingmut halor ka jingthaw ia ki lad ki lynti ban pyniohkam ia ki samla, ban kyrshan ia ki nongrep bad ki shnong ki thaw.
Ka kynthup ruh ia ki jingbatai halor ki kam ba kongsan bala pyntrei ha kine ki san snem ba la lah bala ai kyrteng “Promised Delivered” (La pynurlong ia ki jingkular) bad ki khana ban pynbha ia ka Meghalaya katba ki kam ban sa pyntrei (vision) ka kren halor ka jingialam ia ka Meghalaya na kaba bha sha kaba kham bha shuh shuh.
Kane ka People’s Document ka dei ka jingbatai lyngkot halor ki plan ba bniah ba ka party kala pynwandur lyngba ka jingtwad jingmut na ki nongshongshnong na baroh ki dong ki thain ka jylla Meghalaya. Watla kane ka document ka kren tang ia ki mat ba kongsan ban pyntrei, ka NPP kala kala pynwandur ia ka roadmap (lynti jam) ba na u snem sha u snem ha kaban lah pynyrlong ia kane ka thong ym ban kut tang ha ki jingkulmar tang ban pynpaw ha ki lad pathai khubor.
Kane ka document ka kren kyllum lang ia kaei kaba la Party kala lah ban kynjoh ia kiba bun ki mawjam ha kine ki san snem bala leit noh ha ka ban shakri ia ki paidbah ka Jylla kaba buh ia u mawnongrim uba skhem kat kum kane ka jingpynwandur ia ka thong bala buh khnang ban nang pynbha ia ka imlang sahlang jong baroh ki Nongshongshnong.
Ka NPP ka khot ia kane ka document kum ka People’s Document namar k alum thup ia baroh ki kam ba kala buh thong ban leh na ka bynta uwei pa uwei u nongshongshnong ka Meghalaya.
Pynkha ia 5 lak ki kam : Kane ka People’s Document ka kren ia ka thong jong ka NPP ban pynkha haduh 5 lak tylli ki kam bad ban aikam aijam ia ki samla. La pynleit jingmut halor ka sengkam lajong, kam jngoh kai, kam rep kam riang bad ban pyndonkam ia ki kor digital la ha sor ne nongkyndong jong ka Jylla.
La plan ruh kumno ban nang pynjanai ia ka sap jong ki samla da kaba thaw ia ki multi-sectoral skill park, ban ialam pyntbit shabar ka jylla bad ki kam ban kyntiew ia ka ioh ka kot. Ka NPP kan iai bteng ban pynleit jingmut halor ki kam sengkam lajong da kaba thaw ia ki PRIME hub ha baroh ki Block bad ban kyrshan ia ki nongsengkam lyngba ka skhim PRIME. Ka NPP kan pynleit jingmut kongsan eh ha kaban nang pynjanai halor ka jingshah jied kum ka Best Startup State ha India bad ban iai bteng ha kaban thaw ia ki lad ba kham bha ban ai jingkyrshan ia ki nongsengkam lajong.
Kyrshan ia ki Samla : Ka NPP kan pynleit jingmut ruh ha kabna ithuh bad pyndonkam ia ki rang bad ki thei ialehkai ba kyrhai ka Jylla da kaba ai ia ki tiar bad jaka ialehkai kiba ryngkat kyrdan bad kiwei ki Ri ka pyrthei kynthup ki stadium, ki jingai jinghikai, ban ithuh ia kiba don sap bad ban ai bai bam (scholarship). Ka thong jong ka NPP ha ka kam ialehkai ka long kaba iar bha naduh ka jingpynbiang ia ki tiar bad jaka ialehkai ha ki shnong ki thaw, ban kyrshan ia ki rang bad ki thei ialehkai bad ban pynlong ia ki lympung ialehkai ka Ri (National Level) kiba jop kum ka 2nd North-East Olympic Games.
Ban pynpoi ia ka jingshakri ka Sorkar sha man ki Shnong : Kane ka thong ka long ruh kaba la plan bha kumno ban pynkha ia 1000 tylli ki Chief Minister’s Facilitation Centre ban lah pynpoi ia ki jingshakri jong ka Sorkar sha manla ki shnong ka Jylla. Ka party ka plan ruh ban buh ia ki briew jong ka Village Community Facilitators (VCF) ba kin ai ia ki jingshakri sha ki jaka ba jngai duh. Kine ki briew kin dei ruh ki briew ban hap iakynduh bad iakren na ka bynta ki Nongshongshnong bad ka Sorkar ban ai ia ki jingshakri bapher bapher kynthup naduh ki jingshakri kum ka jingsam ia ki PDS, ka bai bam tynmen bad ban pynbeit ia ki jingeh ba ki paidbah ki mad. Tang kane kan thaw da ki hajar tylli ki kam bad pynthikna ba wat ki Longiing na ki Shnong ba kyndong eh ka Meghalaya kin ioh ia ka jingshakri jong ka Sorkar.
Jingkyrshan ia ki Nongrep : Ka Party (NPP) kan iai bteng ban kyrshan ia ki Nongrep jong ka Jylla lyngba ka flagship programme kum ka FOCUS bad FOCUS+. Kine ki prokram kin dang iai bteng bad yn nang kdup ia baroh ki longiing jong ki Nongrep ka Jylla kam pher shaei ki jaka ba ki sah. Ka thong jong ka NPP ka long ban iai bteng ha kaban ai jingkyrshan lyngba kine ki mission mode project bad ai jingmyntoi ia baroh ki nongrep shuwa ka 2023-2028. Kine ki sienjam kila dep ban sei ia u soh bad wanrah ia ka jingjop sha ki nongrep bapher bapher kum ki nongrep shynrai Lakadong ha kaba haduh 13000 ngut ki nongrep kila ioh jingmyntoi mynta, kaba san snem mynshuwa ka long tang 1000 ngut.
Ban pyniasoh ia baroh ki Shnong da ki surok ba saw aiom bad ki Jingkieng RCC/Steel : Ka NPP kala pruid dak ia ka plan jong kawei pa kawei ka Shnong ban pyniasoh da ki surok ba saw aiom. Watla kan iai bteng ban phaikhmat bha lyngba ki skhim na ka Sorkar Pdeng ban shna ia ki surok thymmai bad pyniasoh ia ki Shnong, kan pynkha ruh ia ka skhim thymmai – Chief Minister’s Village Connectivity Scheme” ban pyniasoh ia kiwei pat ki shnong ba dang sah. Ka party ka plan ban bujli ruh ia baroh ki jingkieng dieng ha Jylla da ka jingkieng RCC/Steel. Lah ban kdew ba ha kine ki 5 snem, ka jingshna ia ki surok ha Meghalaya kala tam ia ka jingshna surok jong ki Sorkar barim ha kine ki 20 snem baka lah.
Ban wanrah ia ki jingtei ba kongsan : Ka thong ka kren ruh ia ki sienjam ban ialam shakhmat ia ka Meghalaya lyngba ki project tei jingtei kiba kongsan ha ki liang bapher bapher. Ban pynjanai ia ki lad pyniasoh da ki liengsuin, pynbiang ia ki kor intenet sha baroh ki shnong, IT Park, Water Managemen bad pynpoi um sha ki thliew iing. Ka Party ka plan ruh ban wanrah ia ki Economic Growth Centre ha baroh ki District ka Jylla kaba iaid kat kum ka New Industrial Policy, ka ban khring ia ki nongseng karkhana bad ki karkhana, kiba lah ban aikam aijam kham bun ia ki nongshongshnong.
Ban kyntiew kyrdan ia ki jaka sumar : Ki jaka symar ha Meghalaya kila sakhi ia ki jingkylla kiba khraw bha. Ka jingshna ia ki jaka sumar ba thymmai bad kyntiew kyrdan ia ki jaka sumar bala don lypa, ka sienjam bala shim na ka bynta ki Kmie bad ki Khunlung Khynnah bad ka Health Insurance Scheme ki dei ki jingjop ba khraw bha ha kine ki san snem bala leit noh. Ka Party ka buh thong ban iai bteng ia kane ka jingjop ha kine ki bynta. Nalor kane, la plan ruh ban pynkha shuh shuh ia ki Chief Minister Affordable Drug Centre ban pynthikna ba ki paidbah ka Jylla kin kot bor ban ioh ia ki dawai dashin.
Shibun tylli ki skhim bala don mynta bad kiba la ai jingmyntoi ia ki paidbah kin dang iai bteng da ka jingnang kyrshan shuh shuh bad nang pynpiar ia ka jingtreikam jong ki. Nalor kine, yn wanrah ruh ia ki skhim thymmai bad ki policy ban lah pynlong ia ka Meghalaya kum kawei ka Jylla na ki Top 10 hapoh ka Ri.
