Shillong, Iaiong 07 : Ka Nongkseh Sports Social and Cultural Club (SS&CC) ha ka sngi Ba-ar, kala pyllait paidbah ia ka jersey thymmai na ka bynta ka samoi lehkai 2026 ha Nongkseh Indoor Stadium, kaba la wan jia ruh hashuwa ka jing iamih madan ban iakhun ia ka Meghalaya State League (MSL) bad ka Shillong Premier League (SPL).
Ka Club kala pylait ia lai jait ki jersey na kane ka samoi thymmai- ka jersey ialehkai hala iing, ka jersey ialehkai shabar bad kawei pat kaba buh ba lah ban pyndonkam ha kano kano ka por.
Ka jersey ban ialehkai hala iing kan dei ka rong sahit bneng, kaban bujli noh ia ka rong lieh bad royal blue ba mynshuwa katba ka jeysey ban ialehkai shabar kan dang iai neh hi ka rong saw.
Ha ka sien kaba nyngkong eh ha kane ka samoi ialehkai, ka club kala wanrah ruh ia ka jersey kaba lai kaba dei ka rong iong bad thoh ksiar, kaba la pynwandur kyrpang ban lehkmen ia ka jingialehkai ba khlem shah rem jong ka club naduh ka samoi ialehkai jong u snem bala lah.
Ha kane ka jingialang la iashimbynta da u Rangbah Shnong ka Raid Sawkur Nongkseh Bah Myrank Thangkhiew, u President ka Club Bah Daniel M Thangkhiew nalor ki nongkitkam na ka Synjuk Balang Kynthei Raid Sawkun Nongkseh, VDP bad ki nongshongshnong ka Nongkseh.
Kum ka Champion jong ki Champion, ka Nongkseh SS&CC kala pynkhreh ban mih madan ha ka lympung ialehkai jong ka Meghalaya State League 2026, kaba la buh ban long ha ki kut taiew jong une u bnai.
Da ka jingioh kiew sha ka Shillong Premier League, ka Club kala nang pynkhlain ruh iala ka kynhun da ka jingwanrah thymmai ia ki katto katne ki rang ialehkai ba kynsai.
Napdeng kiba lah iasoi thymmai ki dei u samla Sheen Stevenson Sohktung, ia uba la khmih lynti ban long uwei na ki rang ialehkai ban hap iapeit bha ha kane ka samoi. Une u rang ba ialehkai sahkhmat, u dei uba ialehkai mynshuwa bad ka Shillong Lajong FC, bad uba ksaw bha ban thep kol ha ki samoi ialehkai jong ki snem bala leit.
Ban pynkhlain ia ka jingialehkai shadien, ka club kala thied ia u Aibiang Mame Nongneng na ka Kickstart FC bad u Banraplang Pyngrope na ka Mawlai SC.
Ha ka kam ap kol, ka club kala thied ia u Babitlang Wahlang uba dei na ka Langsning FC.
 ha ka sngi Ba-ar, kala pyllait paidbah ia ka jersey thymmai na ka bynta ka samoi lehkai 2026 ha Nongkseh Indoor Stadium, kaba la wan jia ruh hashuwa ka jing iamih madan ban iakhun ia ka Meghalaya State League (MSL) bad ka Shillong Premier League (SPL).){kind=link}