Shillong, Nailar 22 : Haba shimkhia ia ka jingmaham jong ka Indian Meteorological Department (IMD) halor ka jinglong jingman ka suinbneng ha ka 21 tarik Nailar, ba iathuh lypa ba kan don ka jingjur slap ha kine ki 7 sngi ban wan, ka Meghalaya Power Generation Corpoartion Limited (MePGCL) kala pyllait noh ia ka um na Pung Umiam ban kiar na ka jingshlei um.
Kane ka jingpyllait um kala jia ha ka por 23:40 baje jong ka sngi Balang.
Ka jingdon jong ka um ha kane ka pung kala kot haduh 3216.15 phut.
Ka MePGCL kala peit thuh bha ia ka jinglong jingman bad kan iai bteng ban antad ia ka jingplie ia ka gate pyllait um khnang ban pynthikna ia ka jingshngain jong ka pung bad pynduna ia ki jingshah ktah jong ki jaka ba don shathem.
