Shillong, Nailar 22: Ka Jawaharlal Nehru Stadium ka la dap da palat khatsaw hajar ngut ki nongkyrshan kiba la ia risa, ia pyrta, jingiakynhoi bad ia kmen katba ka Shillong Lajong FC ka la ioh ban khur ia ka jingjop pyrshah ia ka East Bengal FC ha ka jingiakhun quarterfinal ba long ha ka sngi Balang ha madan J.N. Stadium, Shillong.
Ka J.N. Stadium kala sawa da ki jingkynhoi, bad ki jingkhih mynsiem dik dik ha kaba bun ki nongkyrshan kim lah shuh ban shu shong neh shijaka namar ka jingiakhaid ka jingiakhun hynrei khatduh kila sngewsuk haba iohi ba baroh ki lad thep kol jong ka East Bengal kila lait lut shabar.
Ka Shillong Lajong, ka la ïalehkai bha ha ka kylla step, hynrei ha ka kylla miet, ki rang ialehkai ki la hap iaksaid ban iakhun dohiap pyrshah ia ki jingtynjuh bad ki buit ialehkai jong ka kynhun ialehkai bat bit ka Kolkata. Ka Shillong Lajong ka la thaw katto katne ki kabu ha ki minit ba sdang jong ka kylla miet, hynrei la sakhi pat ba ka bol kala don kham bun ha ki kjat jong ki rang ialehkai ka East Bengal. Hynrei ka jingioh bat ia ka bol kam pynjop ia ki jingialehkai—ka jingthep kol ka pynjop. Ka Lajong ka la shim ia ka kabu ksiar bad ka la ioh ban thep ia ka kol ha ka minit kaba 83 ban pynjop ia ka jingiakhun.
Ïa kane ka jingjop ba pawnam jong ka Shillong Lajong dei ban ai burom sha ki nongkyrshan. Jin ba kane ka jingialehkai ka long ha Kolkata kumba la thmu nyngkong, ka jingthep kol ka lah ban long kaba pher. Ki nongkyrshan na Shillong ki long kiba phylla—bad kiba ieid bha ia ka phutbol!
“Ki nongkyrshan na la iing… ki nongkyrshan nala iing ki long kiba phylla, bad ki la pynsarong ia ngi baroh,” ong u General Secretary ka Shillong Lajong u Bah Larsing Ming Sawian uba don hapdeng ki nongkyrshan nala iing ban peit ia ka jingialehkai.
U Bah Sawian u la ong ruh, “Ngi la tip lypa ba kan long ka jingïalehkai kaba eh… hynrei ngi ïalehkai ban jop.”
Hynrei ka jingialehkai hi ka dei jong ki nongkyrshan na la iing. Ka jingkyrshan jong ki ka long kaba itynnad haduh katta katta ba ki nongialehkai ka Shillong Lajong kin iai kynmaw ia kane ka jingjop bad ka East Bengal kan iai kynmaw ia kane ‘kawei ka jingialehkai ha Shillong.’
Da kane ka jingjop, ka Shillong Lajong kan sa ïakhun pyrshah ïa ka NorthEast United ha ka jingïakhun jong ka North East Derby ban long ha ka sngi U Blei ha Kolkata.
Ka jaka kan nym pyn phoida ia ki nongkyrshan jong ka Shillong ne NorthEast, lane ia ki nongkyrshan jong ka Kolkata bad ki hamsaia kila saphriang kum ka ding ba ki nongpyniaid jong ka Durand Cup ki dang pyrkhat ban pynkynriah biang sa shisien ia kane ka North East Derby na Kolkata sha Shillong.
Haba pyrshang ban ïakynduh ïa ki nongpynïaid jong ka lympung, ka ktien ba thikna ka long, “Ki khubor hamsaia kila saphriang ba ka jingialehkai ka lah ban long ha Shillong hynrei ym pat lah ban pynthikna ia kane”.
Da ki phew hajar ngut ki nongkyrshan ki duwai ba kane ka khubor kan urlong shisha— ka jingialehkai NorthEast Derby ha Shillong, ha kawei na ki lympung ialehkai phutbol kaba rim bad kaba heh tam ha ka Ri. Long kiba pynkhreh phi ki riewieid phutbol na Shillong da ki jersey rong saw.
