Shillong Rymphang 26: Ka Dalmia Bharat Limited hynne ka sngi Nyngkong, kala pyllait paidbah ia ka Dewbilat ba thymmai ba la tip kum u Dalmia Cement RCF Expert ha ka jingialang kaba la long ha Courtyard, Marriot, Shillong.
Ha kane ka jingialang la wan ban iadonlang ki nongpyniaid jong ka Dalmia Cement na kylleng ki bynta jong ka thaiñ Shatei Lam Mihngi bad ruh ki nongdie dewbilat kiba na kylleng ki jaka jong ka jylla Meghalaya.
Ki nongpyniaid ka Dalmia Bharat Limited kila pynsngewthuh ia ki nongdie bad ia ki nongpyniaid iew ia ka Dalmia Cement, ba ka jingai kyrteng RCF ka mut Roof, Column & Foundation bad la shna kyrpang ia kane ka dewbilat ban pynthikna ba kan don ka jingskhem bad jingneh slem jong kino kino ki jingtei bad kane ka long kaba kongsan tam ia kino kino ki jingtei.
Kila iathuh ruh ba ka jingshna ia kane ka dewbilat ka dei kaba la leh ruh ia ka Nano Bonding khnang ba ka dewbilat kan long kaba bit sbak bad kaba skhem bha bad kila ong ruh ba ka jingshna ia kane ka dewbilat ba thymmai kan khring ia ki paidbah ban thied ban ioh ia ki jingtei kiba skhem bad kiban neh slem.
Nalor kane kila ong ruh, ba ka Kompany Dalmia kadei kaba la don mynta la palat 80 snem bad kala pyniaid ia kane ka dewbilat RCF ha ki 25 tylli ki jylla jong ka ri India bad kadei kaba wan ha ka kyrdan kaba 4 hapoh ka ri ban pynmih ia ka dewbilat.
