Shillong, Rymphang 09: Ka seng Congress hynne ka sngi kala pyllait iaki mat treikam lane ka Manifesto iaka ba ai kyrteng ka ‘5 Star Meghalaya’.
Haba kren ha jane ka sngi u president ka Meghalaya Pradesh Congress Committee (MPCC) u bah Vincent Pala ula ong ba ha kine mat treikam, ka Congress kala bsuh 5 tylli ki mat ba kongsan ban pyntreikam lada ka wan haka bor.
U bah Pala ula ong ka mat ba nyngkong eh kadei ban pynkupbor iaki longkmie ha Meghalaya bad kane ka kynthup ia ka jingiarap pisa ka ban long T. 3000 shi bnai iaki longkmie kiba bsa marwei iaka longing ka ba mut T. 36000 man u snem.
“Ka jylla Meghalaya ka paw pyrthei ba ki longkmie kila dei lypa kiba shah pynkupbor naduh mynshwa bad dei namar kane ka Congress ka sngew ba kane ka jingiarap pisa kan nang pynkupbor shuh shuh iaki longkmie namar lada ki longkmie ki kiew ka jylla bad ka ri baroh kawei ka nang kiew shakhmat” la ong u bah Pala.
Ka mat ba ar ba ka Congress ka kular ka long halor ka jingbym don ki kam ki jam bad naka liang ka Party kala kular ban pynioh kam ha man kawei ka tyllong ong.
U bah Pala ula ong ba ka Congress kan wanrah ki ain, ki Polisy naka bynta ban pyllait iaka jylla na ka jingkyrduh kam ki samla bad ban wanrah ki lad lynti ban pynthikna ba uwei pa uwei u/ka samla na man kawei ka longing Kon ioh kam.
Ha ka mat ba lai, ka Congress ka la wanrah ruh ia ka jingkular ban pynlait ia ka jylla na ka jingbam sap ka ba la ktah bha ia ka jylla.
Ka Congress ka la kular ruh ban pynbha ia ka jingtrei kam ha ka tnad bording ka ban lah ban pynlait ia ka jylla na ka jingshah pynlip bording khah khah.
Ka Congress ha ka mat kular ilekshon ka la wanrah ruh ban mat ban shim khia ban ka teh lakam ia u drug ha ka jylla ban pynlong ia ka jylla ka ba laut luid na ka jingpyndonkam ia u drok.
