Shillong, Rymphang 09: U MLA barim ka North Shillong konstitwensi u bah Adelbert Nongrum u badei ruh u kyrtong ka Voice of the People Party (VPP) ha kane ka ilekshon ban wan hynne ka sngi ula ujor daka ejahar halor ka jingpyndonkam bakla iaka pisa kaba la mang naka bynta ban iakhun pyrshah iaka khlam COVID.
Iaka ejahar u bah Adelbert ula mudui ha Sardar Police Station pyrshah iaka jingshah tuh ne iaka jingpyndonkam bakla iaka pisa bala mang daka sorkar pdeng sha ka sorkar Meghalaya naka bynta ban iakhun pyrshah iaka khlam COVID-19.
Haka ejahar u bah Adelbert ula pynpaw ba haka 12 tarik September 2022 ula buh jingkylli hapoh ka ing dorbar thaw ain halor ka jingpynlut ka sorkar naka bynta ban iakhun iaka khlam COVID bad hapdeng ka jubab naka liang u myntri ka tnat ka koit ka khiah ula iathuh ba ka sorkar pdeng ka la mang tang T. 76.56 klur shaka jylla Meghalaya kum ka jingiarap pisa ban iakhun pyrshah iaka khlam.
U bah Adelbert ula pynpaw ba dangshen u nongwad RTI ka jylla u bah Disparsing Rani ula pyntip lyngba ki lad pathai khubor ba ka jylla kala ioh naka tnat Ministry of Health and Family Welfare ka sorkar pdeng T. 15.61 klur haka Phase I bad T. 104.12 klur haka Phase II kum ka jingiarap pisa ban iakhun pyrshah iaka khlam COVID.
Halor kane u bah Adelbert ula ong ba kum u briew ba don ka jingkitkhlieh ula shim iaka rai ban ujor daka ejahar halor ka jingkynnoh pyndonkam bakla ne shah tuh ka pisa bala mang daka sorkar pdeng iaka Meghalaya ban iarap pisa ha ka jingiakhun pyrshah iaka khlam COVID.
U bah Adelbert ula kyntu iaki bor jong ka ain ban leh iaka jingdonkam ban tohkit halor kane namar kane ka jingpyndonkam bakla ne shah tuh ka pisa ka long bein ha bun ki kyndon jong ka IPC.
