Guwahati, Iaiong 04: Ha ka jingpyrshang kaba dang shen ban pynthikna halor ka jingkam trai ka jong ka ia ki bynta jong ka thain shatei lammihngi ha ka jylla Arunachal Pradesh, ka China ha ka sien kaba lai ka la pyllait biang ia ki kyrteng jong ki 11 tylli ki jaka ha katei ka jylla ka thain mihngi ka India.
Ia kine ki kyrteng la pyllait da ka Ministry of Civil Affairs ka China ha ka 2 tarik mnta u bnai, kaba long ruh katkum ki kyndon ain jong ka State Council halor ki kyrteng na ka bynta ki jaka puta.
Na ka liang ka China ka la shim ia ka Arunachal Pradesh kum ka “Zangnan, kata ka thain shathie jong ka Tibet.
Ia ki kyrteng jong ki 11 tylli ki jaka ba la ithuh da ka sorkar la pyllait ha kane ka sngi U Blei ba la lah da katei ka tnat treikam, kata kba kynthup ia ki artylli ki jaka ba madan, ar ki jaka shong shnong, santylli ki jaka lum bad artyli ki wah ha kaba la pynhap ruh ia ki hapo ki adminitrative district, ong ka lad pathai khubor hynnin ka sngi Nyngkong.
Kane ka dei ka kylla kaba lai halor ka jingpynkylla kyrteng ia ki jaka puta jong ka Arunachal Pradesh ia kaba la pynmih da ka tnat civil affairs ministry ka China.Ia ka jingpynkylla kyrteng ha ka kylla kaba nyngkong ia ki jaka hapoh Arunachal la pyllait ha ka snem 2017, bad ha ka kylla kaba ar la pynkylla kyrteng ia ki 15 tylli ki jaka ia kaba la pynmih ha u snem 2021.
Na ka liang ka sorkar India kham hashwa ka la kyntait ia kine ki sienjam ba la shim da ka China ban jer kyrteng thymmai ia ki katto katne ki jaka hapoh Arunachal Pradesh, kata da kaba iai ban ba kane ka jylla kan long bad iai long ka bynta kaba hapoh u pud u sam jong ka India bad pynpaw ruh ba kane ka jingjer kyrteng thymmai kan ym lah satia ban pynkylla ia ki jingshisha baroh.
