Dibrugarh, Iaiong 04: Ki bor pahara ki la ioh ban kem noh ia uwei u dkhot ka kynhun kieng atiar ULFA(I) bad ia uwei pat u nongiarap ka kynhun hadien ka jingkhynra kaba la long ha ki bynta jong ka Joypur ha ki bynta shatei ka Assam hapoh Dibrugarh ha kane ka sngi U Blei ba la lah.
Kane ka jingkhynra ba la pynlong ha ryngkat ka jingiatreilang bad ki bor pahara ba kyrpang na ka tnat Spear Corps Warriors ka la wan long hadien ba ki la ioh ia ka jingtip kaba bniah ha kaba iadei bad ka jingdon jong ki suba dkhot ha ryngkat ki tiar ialeh ha ki bynta jong ka Phaltutola kaba happy hapoh Police station Joypur ha Dibrugarh District ka Assam.
Ia une u dkhot ba la ioh kem la tip kyrteng kum u Yasin Khan (31snem rta), uba dei na ka shnong Jagun, Naharkatia katba Ia une u nongiarap la tip kyrteng kum u Bintu Sharma 33 snem rta.
Na kine la ioh ban kurup kawei ka pistol 7.62 mm ha ryngkat 4 tylli ki kuli. Ha ka jingtohkit baroh kine ki arngut ki la phla halor ka jingiadei bad ka seng lehnoh ULFA(I). Ia kine ki arngut la aiti noh sha ki bor pulit na ka bynta ban pynlong shuh shuh Ia ka jingtohkit.
Ki tyllong khubor ki la ong ba une u dkhot bad u nongiarap ka ULFA(I) ki la pyrshang ban pynrung dkhot na ki thain nongkyndong na ki bynta shatei ka Assam. Watla katta, ia kane ka jingpyrshang ka jong ki la lah ban pynpulom noh da ki bun bunsien da ki bor pahara.
Kiba bun na ki dkhot jong ka ULFA(I) ki dei na ki thain nongkyndong na ki bynta shatei ka Assam. Ka thain shatei ka Assam ka la kylla long ka jaka ba la pynkylla sohpdung da katei ka kynhun kieng atiar, ong ka tyllong khubor.
