Guwahati, Iaiong 29: Da kaba pynpaw ia ka jingshlur bad ka jingpyndep hok iala ka jong ka kamram ba la pynshet ha u, uwei u pulit langrut ka nongbah Guwahati u la lah ban pyllait im ia uwei u briew uba pyrshang ban ryngkoh shapoh ka wah Brahmaputra lyngba ka jingkieng Saraighat flyover ha Guwahati.
“Mynta ha ka sngi ha ka por kumba 3:20 jan miet uwei u briew 26 snem rta u la pyrshang ban pynkut iala ka jong ka jingim da kaba thmu ban ryngkoh napoh ka jingkieng Saraighat shapoh ka wah Brahmaputra. Hadien ba la ioh jingtip halor kane, ka kynhun ki pulit na Jalukbari outpost mardor ki la her sha katei ka jaka bad shim ia ki sienjam ban khanglad bad iada ia utei u briew. Uwei u pulit langrut u Lankeswar Kalita uba dei na Jalukbari outpost u la pyni ia ka nuksa jong ka jingshlur bad ka jingpyndep hok iala ka jong ka kamram ha kaba u la lah ban pyllait im ia utei u briew khlem da khein iala ka jong ka jingim,” ong u heh pulit.
Nalor kata u la ong ruh ba kum ka dak ka jingpynshlur bad ka jingtrei hok iala ka kamram ba la bynshet ha u, une u pulit UBC/1167 Lankeswar Kalita napoh Jalukbari outpost u la ioh pdiang ia ka khusnam kaba T.10,000/- (shiphew hajar).
