Aizawl, Iaiong 29: Ka Aam Aadmi Party (AAP) ka la pyrshang ban iakhun ha baroh ki 40 tylli ki seat ha ka assembly election ka ban sa long ha Mizoram, bad ba ka la wad da ki kyrtong kiba khuid bad shida ban pyniakhun, kane ka long katkum u heh nongialam ka party.
Ka election hapoh ka iingdorbar kaba don 40 ngut ki dkhot hapoh Mizoram la pynkhreh ban pynlong ha kine ki bnai ki ban sa wan. “Ngi dang wad ia ki briew kiba bha ki bym don dak sniew lane ki bym pat donkti ha ki kam bamsap na ka bynta ban pynieng ha kane ka election assembly ka ban wan.” “Ngi khot sngewbha ia kiba kum kine ki briew ban pyniakhun na ka party ha baroh ki 40 tylli ki assembly seat,” ong u Rajesh Sharma, uba dei u nongialam ka AAP uba dei khmih ha kane ka thain shatei lamihngi (Northeast) ha ka jingialang bad ki lad pathai khubor ha katei ka nongbah.
Ka Election Commission ka la ithuh ia kane ka party ba la lamkhmat da u Arvind Kejriwal bad kaba la iaid ha ka lynti kaba la jan kot shiphew snem kum ka national party ha kaba sdang jong une u bnai.Mynta ka AAP ka la synshar ia ka Delhi bad ka Punjab. Lada ka party kan shah jied, u Sharma u la ong ba ka seng kan pynleit jingmut ha ka jingsynshar kaba khuid bad kaba lai na ka bamsap.
“U Myntri Rangbah (CM) jong ngi, u Arvind Kejriwal u la pyni ba ka jingkylla ka dei kaba lah ban urlong.” “Kaei kasba la jia ha Delhi bad Punjab ka lah ruh ban jia ha Mizoram kumjuh,” ong shuh shuh u Sharma.Nalor kata u la ong ruh ba ka party kan ialeh ban wanrah ka jingkylla ha ka liang ka pule puthi, ha koit ka khiah bad ki lynti surok, ban thaw ia ki lad ioh kam bad ban pyllait na ki kam bamsap.”
