Shillong, Jylliew 20: Ka jingiakhih jong ki samla wad kam shipai hapoh ka Ri ban pyrshah iaka skhim “Agnipath’ kala poi mynta sha Nongbah Shillong bad ki samla kiba don hapoh shispah ngut eiei, kila iamih paidbah ban pynlong ia ka jingiakhih hakhmat u motsah nam jong u Khla Wait ka Ri-lum Jaiñtia woh Kiang Nongbah uba don ba Barik.
Kane ka jingiakhih ki samla wad kam shipai kiba la wan na kylleng ki District ka Jylla, ka dei halor ka jing pynsangeh jong ka Tnad Indian Army ia ka eksam Common Entrance Examination (CEE) ka bym shym la pynlong naduh u snem 2021 bad bala rai ruh ban pynduh pyndam noh da ka jingwan jong ka skhim ‘Agnipath’.
Haba iakren bad kine ki samla wadkam kiba la pynkhreh ban iakhun ia ka eksam CEE ki la ong “ Ngi la pyndep ia ka Physical bad ka Medical Test bad ngi la ioh pdiang ruh ia ka shithi ba ngin hap ialeh ia ka eksamin CEE hynrei kynsan kynsan la shu pynkut ia kane ka eksam jong ngi tang namar kane ka skhim bad bthah ia ngi ba ngin applai tymmai biang lyngba ka skhim Agnipath”.
Ngi iengskhem ban dawa iaka Tnad Indian Army bad ka Sorkar Pdeng ba ka dei ban dang bteng ia ka CEE ha kaban jied ia ki samla ban ioh rung kam shipai”.
“Ngim sngew iahap satia ban ialeh ia ka eksam lyngba ka skhim Agnipath namar ka jingpynrung kam ka long beit thik tang na ka bynta saw snem” kila pynpaw.
Kine ki samla kila kyntu ia ki Nongmihkhmat ka Jylla ba kin shimkhia lang ha kaban dawa na ka Sorkar Pdeng ba plie lad ia ki samla ka Jylla ba kin thoh ia ka eksam CEE ban ioh rungkam shipai.
“Ngim iahap satia ban ngin hap applai biang lyngba ka skhim Agnipath namar ngi lah pyndep ia kiba bun ki kyndon jingbthah bad kaba sah ka dei satang ban ialeh ia ka eksamin” kila ong.
“Ngi pyrshah jur ia ka Agnipath namar lada ngi shah jied ngin ioh trei ia ka kam shipai tang 4 snem bad hadien kane, ngin hap ban wad kam biang da kawei. Ka skhim kala kren shai ruh ba ki shipai ba lah ban bteng ia ka kam kin long tang 25 na ka shispah ngut hadien ba kut kane ka saw snem” kila bynrap.
Kine ki samla kila pynlong ruh ia ka jingiaid rally ha Nongbah Shillong hynrei ki bor Pulit kila khanglad noh namar ba kim shym la ioh jingbit na ki bor ba dei khmih ba kin iaid rally. Namar kane ka jingshah khang, kine ki samla kila pynlong noh ia ka jingiakhih hakhmat u mot sahnam u woh Kiang Nongbah.
