Shillong, Rymphang 20: U Lamphang ka ïingdorbar thawaiñ ka jylla Thomas A Sangma ai burom halor ka jingkhlad noh u MP ka Shillong Dr Ricky AJ Syngkon, da kaba pule ia ka biography halor ka jingim jongu ha ka por ba pynlong ia ka jingkren sngewlem hapoh ka ïingdorbar hynne ka sngi Thohdieng.
Ha kane ka sngi, la pynsangeh lut ia ki kam ki jam jong ka dorbar bad la pynlong thik ia ka jingpynpaw ia ka jingsngewlem halor ka jingkhlad jong u MP ka Lok Sabha.
U Dr Syngkon, ula khlad noh ha ka rta kaba 56 snem ha ka 19 tarik u Rymphang bad la kha ia u ha ka 6 tarik u Kyllalyngkot 1972 ha Laitumkhrah, Shillong bad u long u nonghikai bad u riewsain pyrthei uba la aiti bha ha ka kam shakri ka jongu.
Ula leit skul ha St Edmund’s School bad ula pyndep ia ka jingpule skul ka na Laitumkhrah Presbyterian School bad hadien kane ula leit pule ia ka Commerce ha Shillong Commerce College.
Ula pyndep bad ioh ia ka kyrdan Master ha ka Economics bad ia ka kyrdan Doctorate ha ka Economics na ka skulbah North Eastern Hill University.
U Dr Syngkon ula rung ha ka kam sain pyrthei ha u snem 2023 bad ula iakhun ia ka elekshon MLA na Umsning constituency kum u kyrtong ka Voice of the People Party (VPP). Hadien kane ula iakhun ia ka elekshon MP Lok Sabha 2024 na Shillong Parliamentary Constituency na ka VPP ha kaba ula jop don burom bad ioh long kum u dkhot sha ka Lok Sabha kaba 18 jong ka ri.
“Udei u dkhot uba la seng ia ka Voice of the People Party (VPP) bad shakri kum u General Secretary,” la ong u Lamphang.
“Kum u dkhot jongka Parliament, la bna ia ka nam jongu Dr Syngkon kum uba hok bad shida, ka jingstad bad jingshemphang kaba bniah bad uba ieng na ka bynta ka thain shatei lammihngi halor ka hok bad halor ki kam pynroi”.
“Watla udei uba la ngam jylliew bha ha ka jingngeit, ula pyni pat ia ka jingsngewrit, jingnsgewsynei bad ai ruh ia ka jingshakri ia ki paidbah bad ha ka jingim kaba shimet ka jongu” la ong u Lamphang bad ka bynrap “Watla ngam shim la ioh than ia ka lad ban ithuh shimet bha ia u, hynrei nga la ioh jingtip ba nalor ka jinglong kum u nonghikai uba tbit bad u politishan, u long ruh u briew uba sheptieng ia u Blei, u rangbah uba khlain bha ka jingngeit. Ha u snem ba la dep ha ka bnai Nohprah 2025 ula ai jingkren bad ialap shaphang u Blei ia ki hynmen bad para kynthei bad shynrang Garo ha Delhi ha ka jingrakhe lypa ia ka jingialehkmen ia ka Christmas jongka Delhi Achik Christians Fellowship.”
U Sangma ula pynpaw ia ka jingsngewlem da kaba ong, “Nga iasnohkti lang bad ka iing dorbar ban ai burom bad buh ha ki jingduwai ha u Blei jong ngi ba un ai ia ka bor bad ka jingshlur ia ki bahaiing bahasem, kiba iaieid iajan bad ia ki nongkyrshan halor kane ka jingduh kaba khraw”.
