Shillong, Jylliew 3: Ka sorkar Meghalaya kan rah iakren ia ki mat kiba dang sahteng kynthup ia ka jingdawa Inner Line Permit bad ban pynrung ia ka ktien Khasi bad Garo ha ka Eighth Schedule bad u Myntri Kam Pohing ka ri Amit Shah lada ioh lad ban pynsngew ha ka jingwan jong u sha Shillong, ong u Symbud Myntri Rangbah ka jylla Bah Prestone Tynsong hynne ka Sngi Balang.
Haba kylli la kan don ka jingiakren halor ka ILP bad u Amit Shah, u Bah Prestone Tynsong ula ong, ba ka mat hi kadei halor jongka jingialang ka North Eastern Council hynrei ka jylla ka iengskhem ban shimkhia ia katei ka mat.
“Ka Plenary Session lashai ka sngi kadei halor ka NEC, kumta ngin ia buh ia kane sharud” ula ong ha kaba iadei bad ka 73rd NEC Plenary kaban long ha ka 3-5 tarik u Jylliew ha Shillong.
“Ha kaban shimkhia ia ki mat kiba dang sahteng, na ka liang ka sorkar, hooid da kaba thikna. Lada ngi ioh ia ka lad ban iakynduh ia u Myntri Kam Pohiing ka ri ngin pynsngew beit bad ban iakren ia ki mat kiba dang sahteng jong ka ILP bad ka jingpynrung ia ki ktien ha ka Eighth Schedule” ong u Bah Tynsong.
Ula pynpaw ba kitei baroh artylli ki jingdawa kidei kiba la ioh ia ka jingmynjur na ka iingdorbar thawaiñ. “Ngi lah dep ban mynjur ia ka Resolution halor kitei ki artylli ki mat hapoh ka iingdorbar thawaiñ” ula bynrap.
