Guwahati, Jylliew 3: San ngut ki shynrang kila shah kem kiba la shah kynnoh donkti ban leh beijot da ki kynhun ia kawei ka khynnah kynthei kaba dang 15 snem ka rta ha Biswanath district jong ka jylla Assam.
Katkum ki khubor, la iathuh ba katei ka khynnah ka la shah leh beijot da ka kynhun ha ka kali kaba iaid la katto katne bnai shwa ba ki pulit kin ioh ban pyllait im ia ka ha ka taiew ba la dep.
Haba ïakren bad ki nongthoh khubor, ka Biswanath Additional Superintendent of Police (ASP) ka Dipti Mali ka la ïathuh ba ka kynhun jong ki trai shnong ki la bat ïa kawei ka kali kaba suba bad ki la ïoh ban pyllait im ïa ka lanot na kawei ka jaka kaba hap hapoh ka jingpeit jong ki pulit ka Biswanath Chariali Police Station.
“Ki nongshong shnong ki la iathuh ba ia katei ka khynnah bad ki nongshong kali la lap ha ka jinglong kaba sngewsih, kaba lyngkhuid shiteng.Ka khynnah hadien ka la pynpaw ba ka la shah leh beijot da ki shynrang kiba bun hapoh kata ka kali kaba iaid,” la ong u Mali.
Hadien ba la ioh pyllait im, ki pulit ki la register ia ka case hapoh ka kyndon 140(3) (abduction) bad 70(2) (gang-rape) jong ka ain Bharatiya Nyaya Sanhita (BNS), 2023, ryngkat bad ka kyndon 6 (aggravated penetrative sexual assault) jong ka Protection of Children from Sexual Offences (POCSO) Act ha Biswanath Chariali Police Station.
Katei ka lanot ka la pynpaw ba katei ka jingshah leh dusmon ka la sdang naduh ki bnai mynshwa haba la tyrwa bam ïa ka da arngut ki shynrang kiba la kyrpad ïa ka ban kiew ha ka kali jong ki, ha kaba hadien kata la leh beijot ïa ka da ar ne lai ngut ki shynrang.
Baroh san ngut ki nongshah kynnoh la rah sha iingbishar jong ka thain hadien ka jingshah kem ha ka 30 tarik u Jymmang, bad ka jingtohkit kaba bniah ka dang iaid shakhmat. Ki pulit ki la pynthikna ba la ioh kurup ia ka kali kaba la pyndonkam ha katei ka kam runar.
Ki bahaïing jong ka lanot ki la pynpaw ïa ka jingsngewsih kaba jur halor kane ka jingjia bad ki la dawa ïa ka jingpynshitom ba tyngeh mardor, kaba long ka nuksa ïa ki nongshah kynnoh.
