Shillong, Jylliew 23 : U National Vice President ka NPP bad Symbud Myntri Rangbah Bah Prestone Tynsong hynne ka sngi Thohdieng ula ong ba ka Sorkar Meghalaya Democratic Alliance-2 ka dang skhem triang bad kan pyndep ia ka jingsynshar ha baroh san snem ka samoi treikam.
“Kane ka jingiapynbeit ba mynta haba phai hi sha ka Sorkar, ngi dang iaskhem beit triang bad ngi baroh ngi la kut jingmut, ngin pyndep ia ka samoi u 2023 haduh u 2028. Ka (UDP) paralok ba iajan bha, kan dang iai bteng bad ngin ia iaid lang beit” ong u Bah Prestone haba iakren bad ki nongthoh khubor.
Kane ka jingkynthoh jong u kala mih hadien ba ka NPP kala pynkhyllem noh ia ka Executive Committee ba ialam da ka UDP ha KHADC da ka jingkyrshan lang jong ka Congress.
U Bah Prestone ula kyntait ruh ban kynthoh eiei halor ka jingtyrwa ka Congress ia ka jingkyrshan ia ka Sorkar MDA ba ialam da ka NPP khlem ka BJP bad ong “Peit ia ka jingiapynbeit ba mynta, kane ka jingiapynbeit ha ka MDA-2 kan iai bteng tad haduh da kut ka samoi”.
Halor ka jingkynnoh ka UDP pyrshah ia u, u Symbud Myntri Rangbah ula ong ba kumno ka UDP ka lah ban kynnoh ia u ha ka jingpynkyllem ia ka EC haba ma u um dei satia wat u MDC ba shusieh jong ka Council.
“Peit ngam dei wat tang u Dkhot ba shusieh jong ka District Council, kumno ka UDP kan kynnoh ia nga ba nga dei uba pynkhyllem ia ka EC. Sngewbha kylli na ki ba kumno u bah Prestone u lah ban pynkhyllem ia ka EC namar ngam dei satia wat u dkhot ba shu sieh ka KHADC” ula bynrap.
Dang shen, u CEM barim ka KHADC Bah Titosstarwell Chyne ula kynnoh ba kawei na ki kyndon bala buh da ki MLA ka People’s Democratic Front (PDF)-Bah Gavin M Mylliem (Sohra) bad Banteidor Lyngdoh (mawkynrew)-haba wan iasoh bad ka NPP ka long ban weng noh ia u kum u CEM namar u dei u jingma ia ka lawei ka jong ki.
Haba kynthoh ia kane, u Bah Prestone ula ong “Peit na ka jingsngew kutlad, kino kino ki nongialam haba poi hi ha kum kane ka khep, teng teng ki ju kren kumne, kynnoh ia kiwei, kaba mut ba kim pdiang ba lehse ka jingbakla ka sdang na u hi. Ka ju jia hi ia u briew uba rem elekshon, kin ym kynnoh ba ki rem eleskhon namar ka jingbakla lajong, hynrei kin kynnoh ba ki theh pisa…..bad namar kila leh ia kane, leh ia katai—kane ka dei kaba ju mih beit”.
Haba kylli la kan don ka jingpynkylla ia u MDC ba shusieh, u Symbud Myntri Rangbah ua ong ‘Wat kylli na nga namar sa shisien, ka sienjam hi ka dei kaba hap ban shim da ka EC jong ka KHADC. Hynrei ia mynta hi kam pat don kum kata ka jingtyrwa bala phah sha ka Sorkar lane sha nga…ngam don eiei ban ong ia kata”.
Ia ka kam MDC ba shusieh jong ka KHADC la bat da u Chief Adviser ka UDP Bah Bindo M Lanong, uba dei ruh u Symbud Myntri Rangbah barim ka Jylla bad kumjuh ruh u Lamphrang barim ka Iingdorbar Thaw Ain ka Jylla.
Pule lang ia kane: Da ka rally kali arshaka yn ialap droks ki Pulit ha Ri-Bhoi
