Shillong, Jylliew 11 : U Symbud Myntri Rangbah ka Jylla ba khmih ia ka tnad kam pohiing (Police) Bah Prestone Tynsong ha ka sngi Ba-ar, ula ong ba ka Ain hi kan sa leh eiei pyrshah ia ki kam beain jong ka HNLC haba kyntu ia kane ka Seng kiengatiar ba kan wan phai biang sha ka jingiakren iasuk.
Kumba 4 ngut ki ehrang ka HNLC kila shah kem halor ka jingsam shithi dawa pisa bad byrngem briew ia kaba la shem daki Pulit hadien ka jingioh kyndang ia ka “Sleeper Cell”.
Haba kren halor kane ka bynta,u Bah Prestone ula ong “Ka Ain hi kan shim iala ka jong ka lynti ym tang ia ka HNLC hynrei ia kino kino ruh kiba leh kam bymman”.
Ula kyntu ruh ia ka HNLC ba kan sangeh noh ia baroh ki kam bymman bad ong “Ka jingkyrpad jong nga ka long ban sangeh noh ia ka jingleh kam bymman bad ban wan shakhmat bad iatreilang bad ka Sorkar bad baroh lang na ka bynta ka jingshngain bad ka roi k apar jong ka Jylla baroh kawei”.
Haba kyntu ia ki riew paidbah ban pyntip sha ki bor ka ain ia kum kine ki kam bymman, u Bah Prestone ula ong “Ha ka jingshisha, ngi la dep kyrpad da kaba shai ia baroh ki nongshongshnong, ba lada ki iohpdiang ia ki shithi dawa pisa lane shah byrngem, ba kin sngewbha ban pyntip sha ki Pulit ba kin ioh leh eiei mardor”.
Haba kylli, u Symbud Myntri Rangbah ula ong ba ka Sorkar kala kren shai ba ka pyrshah jur ia ki kam bymman.
“Lada phi kren ia ki dkhot ka HNLC ha ka kyrteng ka Sleeper Ceel bad ki trei hapoh ka jingbthah jong ki Nongialam ka HNLC, lada ngi ioh jingtip ia baroh kine kiei kiei, phi tip ba ka ain kan sa iaid la ka jong ka lynti” ula ong.
Haba kyntu ia ka HNLC ba kan wan phai biang sha ka jingiakren iasuk, u Bah Prestone ula ong “Ha kawei ka liang, nga kyrpad biang ia ki, nga ong biang sa shisien b aka jingkhang ban iakren kumba ngi la dep leh teng, ka dang iai plie ia ki dkhot ka HNLC”.
“Ia mynta hi kam shym la don ka jingaiktien, kumta, ka Sorkar kan hap ban pynthikna ba ki nongshongshnong ka Jylla kin don hapdeng ka jingshngain la ka dei ha ka dur ka jingioh pdiang shithi dawa pisa lane ka jingshah byrngem byrsit, ngin ym ailad satia ba kan jia” ula ong.
