Nongstoiñ, Nailar 7: Ka seng HSPDP katba nang jam sha ka elekshon MLA 2023, kala nang troin da ka jingjur ka jingiaphet seng jong ki Dkhot bad ki Nongialam na ki Constituency bapher bapher.
Mynta sa ki Nongialam bad ki Nongkyrshan jong kane ka seng riewlum na Mawthadraishan, kila rai ban mih noh na kane ka party kaba kila don bun snem naduh ka por shuwa ba ka Mawthadraishan kan ioh ia ka jingithuh kum ka Constituency.
Kine ki Nongialam ki kynthup ia u President Bah Damian L.Marshiangbai, u Assistant Organising Secretary bah Rowel Rani, u Joint Secretary bad ki Executive member kiba kynthup ïa u Bah Nassar Nongsiej, bah R. Lawryniang ryngkat ki nongkyrshan.
Katkum ka kyrwoh khubor ba ki la phah, la ong ba daw kaba pynlong ïa ki ban mih noh na kane ka party, ka long namar ka jingbym don shuh ïa jingïasngewthuh jingmut hapoh ka party, khamtam namar ka jingïaid lait jong u Candidate ïa ki riti treikam jong ka party kiba la seng nongrim da u Maieid Hopingstone Lyngdoh (Bam kwai ha ïing u Blei).
