Shillong, Naiwieng 17 : Ban kyntiew ia ka kolshor ki nong Japan ha Meghalaya, ka Japan Caravan kala sdang hynne ka sngi Thohdieng ha Shullong ia kaba la iashimbynta da u Ambassador ka Japan sha India u Hiroshi Suzuki ha ryngkat ki Myntri Sorkar ka Jylla Kong Ampareen Lyngdoh bad Bah AL Hek.
“Ka North East Japan Caravan 2023, ka dei kaba la pynlong lang da ka Japan Foundation, New Delhi bad ka Indian Council for Cultural Relation-North East (ICCR-NE), bad kala sdang hynne ka sngi Thohdieng bad kan kut ha ka 19 tarik Naiwieng.
Ia kane ka caravan la pynlong ha U Soso Tham Auditorium, Shillong ha kaba u Ambassador ka Japan ula ai jingkren kum u kongsan bad kren ruh halor ka jingnang khlain ka jingiadei hapdeng ka Japan bad ka India khamtam hapdeng ki nongshong shnong.
“Nga kyrpad ia baroh ba kin wan ban sakhi ia ka kolshor ki nong Japan ka ban don hangne haduh lai sngi. Ka dei ka sien ba nyngkong jong nga ha Shillong hynrei nga iohi ia ka jingiasyriem na ka jingmih ki dieng cherry. Ki paid Japan ki ieid ia ki syntiew cherry, namar kata nga kwah ban leit sha ka festival kaba la pynlong hapoh ka Jylla” ong u Suzuki.
