Shillong, Naitung 12: Ka long kaei kaei kaban sahnam bad sah kynmaw, ha kaba ka Myntri ka Sorkar Pdeng kaba khmih ia ka Pla Tyngka bad iaka Corporate Affairs ka Nirmala Sitharaman, kala leit jngoh ia ka Sohbar, ka jaka kaba itynnad ha East Khasi Hills bad kaba don ruh hajan khappud bad ka ri Bagladesh, kum shi bynta jong ka jingphaikhmat ka Sorkar Pdeng ia ka thain khappud lyngba ka Vibrant Villages Programme (VVP).
Haba kren ha ka jingialang kaba kynthup ia ki nongshong shnong, ki khynnah skul bad college bad ki ophisar, ka Myntri Pla Tyngka kala banjur ba ki shnong ha khappud kum ka Sohbar kim dei kiba khatduh, hynrei ki jaka kiba nyngkong eh ban iadei na ka bynta kito kiba wan rung shapoh India.
“Ka long ka burom ban don ha Sohbar mynta ka sngi. Nga la jied ia kane ka jaka, kadei namar ba u Myntri Rangbahduh ka ri u ngeit ba ki shnong ha khappud kim dei kiba kut jong ka ri India, hynrei ki jingsdang. Kine kidei ki khmat bad ki shkor jong ka ri jong ngi bad ki dei hok ban ioh ia ka jingphaikhmat kaba kyrpang ha ka roi ka par” kala ong.
Ka Sitharaman kala ong ba ka wat baar jong ka Vibrant Villages Programme mynta kala nang iar ha ka thain shatei lammihngi kynthup ia ka Meghalaya.
Kala pynpaw ia ki 4 tylli ki mat kiba kongsan jong ka VVP ha Sohbar kaba kynthup ia ki jingshna ia ki surok, ki lad pyniasoh lyngba ka Telecom bad Digital, ka jingpyniar ban ioh peit ia ki Television bad ka jingioh iaka bording elektrik.
Ka Myntri kala pynthikna ba ia kitei ki jingdonkam kiba kongsan kynthup ia ka jingdon ki Bank bad ki ophis treikam kiba iadei bad ka pisa pilain hapoh jong ka 5 km, ka pule puthi, ka Primary Health Care (PHC), yn sa pynthikna hapoh jong katei ka prokram.
“Nga lah kren bad ka District Collector. Ha kaba palat 1,600 ngut ki briew kiab sah hangne, ka VVP kan pynthikna ba man la ki longiing kin shah kynthup lang abd yn ym don mano mano ruh kiban shah ieh noh” kala pynthikna.
Da kaba iohi iaka lad ban kiew lyngba ka kam jngohkai ha Sohbar, kaba don ia u pud u sam da ka wah kaba itynand bad ki khlaw ki btap kiba jyrngam, ka Myntri kala ai khublei ia ka sorkar Meghalaya kaba thmu ban buh ia ka jaka jngohkai lyngba ka jingkyrshan na ka Externally Aided Assistance (EAP), kynthup ia ka jingkyrshan na ka New Development Bank (NDB).
“Ki jingtei kiba iadei bad ka kam jngohkai kin wanrah ia ki nongwankai bad kan long ka lad ban ioh kamai jakpoh bad kane kan pynlong ia kane ka shnong ban khlain ha ka ioh ka kot” kala ong.
Kala iakren ruh bad ki samla kane ka thain bad pynpaw ia ka jingsngewtynnad halor ka jingwan bun ngut ki khynnah pule kynthei ha kane ka jingialang. Kala banjur ia ka jingdonkam ban ioh ia ki ald ban pyniasoh bad ki kor Digital, ban nang kiew ha ka pule puthi, bad kaj ingkyrshan ia ki nongshna ne jongthain kti bad ki samla ka thain khappud kidei ban ioh ia ki kabu ban kiew shaphrang.
“Ka shnong jong phi kadei ban ai ia ki kabu ym ban pynlong ban mih noh na ka shnong. Da ki kor digital bad ka jingioh ia ka lad ban tip bniah shaphang kiwei, wat ki nongshna bad nongthain jingthain kti na Sohbar ki lah ban khring ia ki nongthied na kylelng ki ri jong kane ka pyrthei” kala ong.
Haba kren pynkut, kala pynpaw ia ka jingkyndit ban tip ba ym pat ju don uwei ruh u Myntri ka Sorkar Pdeng ban leit jngoh ia ka shnong Sohbar mynshaw.
“Ka long kaei kaei ka bym lah ban ngeit ban ga dei ka Myntri ka Sorkar Pdeng kaba nyngkong eh ban wan jngoh ia kane ka shnong kaba itynnad. Hynrei mynta ka jingkhang kala plie. Kane kadei ka jaka kaba u slap u shong u sah, ka shnong kaba khih ba ksar bad ka long kaba kit jingmut ia man la ka khyllipmat kaba nga pynlut hangne. Nga kyntu ia ki nongshong shnong ba kidei ban long kiba ioh jingtip shaphang ka sorkar bad ban iarap ia ngi ba ngin sngewthuh bha ia ka jingdonkam ki jong phi” kala ong.
Kane ka jingleit jngoh kala long ka khyllipmat kaba kongsan jong ka jingpyrshang ka Sorkar Pdeng ban pynkylla dur ia ki shnong ha khappud kum ki enjin jong ka roi ka par, ban pynthikna ba dei ban pyntreikam pura ia ki skhim jong ka Sorkar Pdeng bad ban thaw ia ki shnong ki thaw kiba khih ba ksar bad kiba shaniah halade.
.){kind=link}