Kohima, Rymphang 27:Ka jingdon jong baroh ki nongwan thep vote ha kane ka ilekshon assembly ha Nagaland mynta ka sngi Nyngkong ka long haduh 82.42 per cent, kata na ki 13.16 lak ngut ki nongthep vote ha ka jylla ia kaba la pynlong ha ki 59 na ki 60 tylli ki constituency hapdeng ka jingpyrkhing pahara, ong ki heh nong pyniaid ilekshon.
Kane ka jingiathep vote ka la sdang naduh ka por 7 baje mynstep ha kaba haduh palat 13 lak ngut ki nongthep vote kin ai ia ka rai na ka bynta ki 183 ngut ki kyrtong.
Baroh ki don 13,17,632 ngut ki nongthep vote ha Nagaland ha kaba 6,61,489 ngut ki dei ki shynrang bad 6,56,143 ki kynthei.
Hadien ba u la pyndep ia ka jingthep vote, u Myntri Rangbah (CM) ka Nagaland u Neiphiu Rio u la pynpaw sha ki lad pathai khubor da kaba ong ba ka seng BJP bad ka NDPP kin ioh ia ka jingjop kaba donburom ha kane ka ilekshon assembly.
Nalor kata u la pynpaw ruh ia ka jingkyrmen ba ka jingiakren halor ka mat kaba iadei bad ki jingeh sain hima sima jong ki paid Naga kan kut noh shen.U la ong ruh ba ka long ka jingpynshlur ha kaba na ka liang ka seng kieng atiar NSCN-IM bad ka Naga National Political Groups (NNPGs) kham hashwa ki la pynmih ryngkat lang ia ka rai ba kin iaid shakhmat ban pynurlong ia ka jingiakren iasuk hapdeng jong ki Naga bad ka sorkar pdeng.
Na ka bynta ban pynneh ia ka shongsuk shongsain la pynkhlain ia ki bor pahara ha baroh ki jaka, kata watla ki la don katto katne ki jingiakynad ma malu mala ha ki bynta jong ka Bhandari Assembly constituency kaba hap hapoh Wokha district.
