Shillong, Iaiong 25 : Ka ding kaba shyrkhei bad ba klang bha kala bam ia kiba bun ki bynta jong ka khlaw Catchment Area ka Nongbah Shillong hynne ka sngi Palei bad la suba jur ba kane ka jingpluh ka lah ban dei na ka jingher phylliah ding ne don ba thang khlaw.
Kane ka jingpluh kane ka khlaw ba don ki tyllong um bam umdih jong kiba bun ki Shnong ha Sor Shillong, kala jia naduh ka por 10 baje eiei mynstep bad la iathuh ba ka ding kala bam lut ia ki khlaw naduh ka thain Lumparing-Malki haduh ka thain Motinagar.
Ka jingshit kyr-ang ka suin bneng kaba la pynring tyrkhong ia ki khlaw ki bthap bad ka jingjur jong ka lyer, kala nang pyrsut ia ki thylliej sing ba kin pur sted sha kylleng ki bynta jong ka khlaw.
Ia kane ka jingpluh la lap nyngkong da ki nongtrei ka Tnad Khlaw kiba khmih ia kane ka khlaw Catchment Area, kiba la iamih ban iakhun ia ka ding hynrei namar ka jingpyrsut jong ka lyer, kine ki nongtrei kim shym la lah satia ban tehlakam.
Namar ka jingiohi ia ka jingnang pur sted, la pyntip noh mar mar sha ka Tnad Pynlip Ding ka Jylla, kaba la phah ia ki kali pynlip ding sha katei ka khlaw ban iakhun ia ka ding.
Kumjuh ruh wat ki paidbah Nongshongshnong ka thain Khliehshnong Malki, Risa Colony bad Motinagar kila iamih ban iarap lem ia ki nongtrei ka Tnad Khlaw bad ki Pulit pynlip ding ha ka jingiakhun ia ka ding.
Kat haduh ba thoh ia ka khubor, ki Pulit pynlip ding ki dang iakhun ban pynlip ia ka ding ha kane ka khlaw.
