Shillong, Jymmang 04: U Myntri Khynnah ka Ministry of Home Affairs (MHA) Nityanand Rai hynne ka sngi Palei, ula plie paidbah iaka Land Port Dawki ha ka jingdonlang u Symbud Myntri Rangbah ka jylla Bah Sniawbhalang Dhar.
Haba kren ha ka jingialang u Myntri Khynnah ula ong “U Myntri Rangbahduh ka ri u Narendra Modi ym shim la leh klet ban kyntiew iaki kam pynroi haka thain shatei lam mihngi bad wat ia ka jylla Meghalaya, la ka dei ka kolshor, ka koit ka khiah ne ka rukom im ki briew bad kiwei kiwei, ha kaba ka sorkar pdeng kala shimkhia ha baroh ki liang”.
“Ka sorkar pdeng kala trei shitom ha kaban pynlong iaka Meghalaya kum ka jylla kaba khlain bad ka sorkar ka buh hakhmat eh ia ka thain shatei lam mihngi jong ka ri” ula bynrap.
Ula ong, da ka jingdon katei ka Land Port la khmih lynti ba kan kyntiew ia ka kam jngohkai bad iaka kam khaii pateng ha ka jylla bad ha ka ri hi baroh kawei.
“La shna ia katei (Land Port) da kaba buh hakhmat ia ka jingdonkam jong baroh ar tylli ki ri bad la buh ia ki jingdonkam kiba hakhmat eh naduh ka kudam, ka jaka bam, ka jaka rah ia ki tiar jong ki nongjngohkai, ka electric substation bad kiwei kiwei. Ka jingthmu ka long ban wanrah lang ia baroh ki kynhun bad baroh kiba don bynta lang ha kawei ka rynsan” ong u Nityanand Rai.
U Rai ula pynkynmaw ruh iaka jingiadei kaba shipara hapdeng ka ri Bangladesh bad ka India bad katba nang iaid ki snem kane ka jingiadei kala nang khlain bad mynta ka jinglah ban pyniasoh ia kine ki artylli ki ri kan kyntiew ha ka liang ka koit ka khiah bad ka pule puthi bad kiwei kiwei ki liang.
Une u Myntri Khynnah ula iaroh iaka jingitynnad jong ka jylla Meghalaya khamtam eh ka Dawki bad kane ka jingitynnad kala ktik iaka jingmut ka jongu naduh ka sngi ba ula poi ha kane ka jaka .
Ka Dawki Land Port kadei ka projek kaba kongsan jong ka sorkar India, kaba ka jingthmu kaba hakhmat eh ka long ban kyntiew iaka khaïï pateng hapdeng ka ri India bad Bangladesh bad kane ka Land Port Dawki kadei ruh ka shlem ha ka khaii bad ha ka kit ka bah hapdeng ka ri India bad Bangladesh, ban plie lad iaka jingkit ia ki mar ki mata, ki briew bad ki kali hapdeng kine ki ar tylli ki ri.
Kane ka Land Port Dawki kadei kaba hap hapoh ka West Jantia Hills kaba jngai 55 Km naka District Headquarter, Jowai bad kaba jngai 84 Km naka nongbah Shillong, katba ka Land Port jongka ri Bangladesh ka don ha Tamabil, kaba hap ha ka Sylhet District.
Ia ka jingtei iaka Land Port Dawki la ai jingmynjur da ka High Level Empowered Committee (HLEC) jongka Ministry of Home Affairs ha ka 4 tarik u Rymphang 2016 bad la tei ia ka Land Port ha ka jaka kaba don 23 akar bad ka jinglut jingsep ha kaban tei iaka kala kot T.83.38 Klur.
Ha kane ka Land Port la tei iaka Passenger Terminal Building, Cargo Terminal Building, Warehouse, Toilet Blocks na ka bynta ki nongniah kali, jaka bam bad ki jaka leit shabar, Entrance/Exit Gate na ka bynta ki nongleit nongwan, ki Cargo Vehicles, Electric Sub-station, Rummaging Shed, Pump House, Sewage Treatment Plan bad ka Underground Water Tank.
Haka jingplie ia katei ka projek la iadonlang u High Commissioner ka India sha Bangladesh u Pranay Kumar Verma, u Chairman ka Land Port Authority Bangladesh u Mohd Alamgir, u Chairman LPAI u Aditya Mishra, u MLA ka War Jaintia u Bah Lahkmen Rymbui bad kiwei kiwei.
