Shillong, Risaw 14: Ka jylla Meghalaya hynne ka sngi, kala ioh pdiang iaka jaka sumar kaba dei tang naka bynta ka jingpang bampong (Cancer) ha kaba u Myntri ka tnad ka koit ka khiah, ka sorkar pdeng u Dr. Mansukh Mandaviya ula plie paidbah iaka Regional Cancer Center jong ka North Eastern Indira Gandhi Regional Institute of Health and Medical Sciences (NEIGRIHMS) Shillong.
Kane ka Regional Cancer Center jong ka NEIGRIHMS kadei kaba don haduh 252 tylli ki jingthiah naka bynta ban ai jingsumar ia kiba pang bampong (Cancer).
Nalor ka Regional Cancer Center, u Dr. Mansukh Mandaviya ula plie paidbah ruh iaka Under Graduate Medical College kiba thymmai, ka Building ba thymmai jong ka Nursing College, ki Hostel, ka Modular OT bad Guest House ba thymmai ha NEIGRIHMS Shillong bad ula buh ruh ia u maw nongrim jong ka Critical Care Block kaba don 150 tylli ki jingthiah.
Haba kren ha kane ka sngi u Dr. Mandaviya ula ong “Kine ki jingshakri ba plie thymmai kin pynbiang ia ki jingdonkam ha ka jingai jingshakri ha ka koit ka khiah ia ki briew ka thain shatei lammihngi. Ka Sorkar Pdeng ka ieng skhem ban kyntiew ia ki jingdon jingem ha ki kam ai jingsumar ha ka thain shatei lammihngi bad ban ai ka jingshakri kaba bha ha ki jingsumar ia ki briew jong ka thain.”
U Myntri Sorkar Pdeng ula ong ruh, ba kine ki jingdon jingem ba thymmai ha NEIGRIHMS kin iarap ban wanrah bad pynneh ia ki riewshemphang ha ki kam ai jingsumar ha ka thain shatei lammihngi. Ula iaroh ia ka rukom treikam bad ka jingkhuid ha NEIGRIHMS bad ula ong ruh ba ka Sorkar ka ieng skhem ban kyntiew shuh shuh ia ki jingdon jingem ha NEIGRIHMS khnang ba kane ka jaka ka sah kum ka jaka pdeng na ka bynta ka jingai jingsumar, ka jingwad bniah bad ka jingai jinghikai ia kito kiba trei ha ki kam ai jingsumar na ka bynta ka thain shatei lammihngi.
U Dr Mandaviya u la ong ba ka Sorkar India ka peit ia ki kam ai jingsumar ha ka rukom kaba pura. “Ngim tei tang ia ki jingdon jingem katkum ka juk mynta ha ki kam ai jingsumar. Ngi la kyntiew ruh ia ka jingdon ki doktor ki nurse”.
Ha kine ki khyndai snem ba la dep, ka jingdon ki medical kolej ka la kiew arshah ha ka ri. Ngi la tei 1,70,000 tylli ki Health & Wellness Centre ha kylleng ka ri. Ngi dang tei ruh kawei ka Critical Care unit ha man ka distrik jong ka ri”, u la ong.
Naka liang u Director ka NEIGRIHMS u Prof Nalin Mehta ula ong ba kine ki jingdon jingem kiba thymmai kin kyntiew ia ki jingai jingshakri ha ka jingsumar ha NEIGRIHMS bad kan kyntiew ia ka jingdon ki seat pule MBBS bad B.Sc. Nursing ha Meghalaya.
U la ong ruh ba lyngba ka jingkyntiew ia ki jingshakri ha ki kam ai jingsumar ha ka thain shatei lammihngi, ki briew kin lait na ka jinghap leit jngai sha kiwei kiwei ki bynta jong ri na ka bynta ki jingsumar.
Ha kane ka sngi la don lang u MLA Mawryngkneng Constituency u Bah Heaving Stone Kharpran bad u Director ka NEIGRIHMS u Prof. Nalin Mehta, ki nonghikai bad ki samla pule jong kane ka Hospital.
 ha kaba u Myntri ka tnad ka koit ka khiah, ka sorkar pdeng u Dr. Mansukh Mandaviya ula plie paidbah iaka Regional Cancer Center jong ka North Eastern Indira Gandhi Regional Institute of Health and Medical Sciences (NEIGRIHMS) Shillong.){kind=link}