Gangtok, Risaw 15 : Ki shipai ka Trishakti Corps kila pynlong ia ka rescue mission (leit ai jingiarap ia ki lanot) ha North Sikkim naduh ka 7 tarik Risaw haduh 13 tarik Risaw bad ioh pyllait ia 245 ngut ki briew kila sahkut ha ka shnong Rabom kaba don ha North Sikkim.
“Da kaba iaid lyngba ki lum, ki riat ki ram bad ki khlaw ba rben hapdeng ka jingpynthut ka suin bneng, ki shipai kila poi sha ka shnong Rabom bad ioh ban ai jingiarap ia ki 245 ngut ki briew kiba sahkut ha kane ka shnong. Kine ki shipai kila sam ia ki maram bad ki dawai ia kine ki lanot” ong ka kyrwoh na ki shipai.
Kine ki shipai kiba khlem shongthait ban iaid hapdeng ka jingpynthut ka suinbneng, kila iaid haduh 14.8 km ka lynti iaid bad ioh pyllait im ia 97 ngut ki nongtrei jong ka Kundan Hydro Power Project bad kuba 80 haduh100 ngut ki trai shnong.
Kine ki shipai kila shna ia ka helipad hapoh ka Shnong bad shna ia ki lynti iaid kjat ban ioh pynbteng ia ka jingai jingiarap ia ki briew ba sahkut ha ka shnong Rabom, Menshithang bad Chubinbin.
Palat 70 ngut ki briew kila iap ha ka jingshlei um ha Sikkim, kaba la jia na ka jingther kynsan u lapbah lapsan kaba lam sha ka jingshlei um ka Wah Teesta myn ha ka 4 tarik Risaw, 2023.
