Mairang, Naitung 10: U Myntri ka Sorkar Pdeng ba khmih ia ka Fisheries, Animal Husbandry bad Dairying Parshottam Rupala, hynne ka sng Nyngkongi, ula plie paidbah ia ki project bapher bapher hapoh ka Ri kiba iadei bad ki kam ri dohkha ba kynthup ruh ia ka Fish Processing Unit ban pynmih tungtab ha Mairang, Eastern West Khasi Hills.
Ia kine ki project la plie kum shibynta jong ka jingrakhe ia ka National Fish Farmers Day bala pynlong da ka Ministry of Fisheries ka Sorkar Pdeng lyngba ka virtual program bala iashimbynta da baroh ki Jylla ka Ri.
Kane ka Fish Processiong Unit ha Mairang ka dei jong ka seng treilang Y Kharsyntiew SHG kaba don ha Umwiehsup, Mairang ia kaba la bei pisa na ka skhim Pradhan Mantri Matsya Sampada Yojana (PMMSY) jong u snem 2021-2022, kaba la pyntreikam lyngba ka ophis u Superintendent of Fisheries, West Khasi Hills District, Nongstoin,
Ha kane ka prokram ha Mairang, la wan iashimbynta ruh u Superintendent of Fisheries ka West Khasi Hills District, Nongstoin, Bah A. Laloo, kiwei kiwei pat ki nongtrei ka tnat Fishery, u Syiem Khynnah jong ka Hima Nongkhlaw, u Paiem K. M Syiemlieh, ki nongialam shnong lem bad ki paidbah ka thain.
Ha kane ka Fish Processing Unit, lyngba ki kor ki bor katkum kane ka juk kaba mynta, yn lah ban pynmih tungtap ia kiba yn pyniaid ha ki iew ki hat bapher bapher ha ka jylla hi baroh kawei.
Ka jingplie ia kane ka shlem pynmih tungtap ka long shibynta na ka jingpyrshang jong ka sorkar, ban kyntiew shuh shuh ia ka ioh ka kot jong ki nongshong shnong kiba ia don bynta bad ka kam ri bad die dohkha, ne kino kino ki marbam ba lah ban pynmih na ka dohkha.
Kiwei kiwei pat ki bynta jong katei ka prokram ki kynthup ia ka jingkren lyngkot na I nongioh bhah na katei ka skhim, kata, I Kong B. Kharsyntiew, I ba dei I President jong ka Y.Kharsyntiew SHG bad ka jingpyni nam ia ki tiar ki tar kiba pyndonkam ha kaban pynmih tung tap.
Pule lang ia kane: Hukum u DC ban pynpra ia kumba 57 tylli ki karkhana coke ba be-ain ha West Khasi Hills
