Williamnagar, Nailar 14: U Myntri ka sorkar jylla uba khmih iaka tnad PHE u Marcuise N. Marak hynne ka Sngi Nyngkong, ula plie ia ka Darimgre Water Supply Scheme (DWSS) bad ula aiti ruh ia ka syrnod ha u President jong katei ka shnong.
Ia ka Darimgre Water Supply Scheme la mang lyngba ka Jal Jeevan Mission ha u bnai Nohprah 2022 ha ka jinglut kaba kot T.1.28 Klur bad la sdang pyntrei ia kane ka projek ha u bnai Kyllalyngkot 2023 bad la pyndep pat ia ka ha u Naitung 2023.
Ka shnong Darimgre kaba don 110 tylli ki longïing ka hap hapoh jongka Samanda C&RD Block bad ka jngai 7 Kilomitar na Williamnagar.
U Marcuise Marak haba kren ha ka jingialang ula ai khublei ia u Myntri Rangbahduh ka ri u Narendra Modi uba la sdang iaka Jal Jeevan Mission (JJM) ha ka ri India baroh kawei bad ula ai khublei ruh ia u Myntri Rnagbah ka jylla u Conrad K. Sangma uba la ai jingkyrshan ha ka jingpyntreikam iaka skhim JJM ha ka jylla.
Nalor kane ula pynpaw ruh ia ka jingsngewnguh ia ki heh ophisar jong ka tnad PHE kiba la trei shitom ban pyndep ia katei ka projek tang ha ka por kaba lyngkot bha, na ka bynta ban pynpoi iaka umbam umdih sha ki nongshong shnong.
U Myntri ula kyntu ia ki paidbah ba kin shumar sukher bha ia ka jaka pynlang um bad ban long kiba antad ha ka rukom pyndonkam ia ka um bad kim dei ban pynlehnohei kai iaka um.
Ha katei ka jingialang la iadonlang u Superintending Engineer ka Simsanggre Circle Jebulun M. Sangma, u Executive Engineer ka Simsanggre Division u Sujeet P. Marak, u SDO ka PHE Simsanggre Division u Tengchrang G. Momin, u SDO ka Rongjeng Sub-Division u Sengkam P. Marak, ki riewrangbah ka thaiñ bad kiwei kiwei.
